«Ирандағы соғыстың кесірінен АҚШ-тың Украинаға уақыты жоқ» - Зеленский
Украина президенті Владимир Зеленский ZDF телеарнасына берген сұхбатында АҚШ-тың Украина мәселесіне жеткілікті назар аудармай отырғанын айтты.
Оның сөзінше, қазіргі уақытта АҚШ пен Израильдің Иранға қатысты әскери әрекеттері Вашингтонның уақытын алып отыр.
«Олар Иранмен келіссөздер мен байланыстарды үзбей жүргізіп жатыр, ал Украинаға уақыттары жетпейді», - деді Зеленский.
Сонымен қатар ол Батыс елдерінен, әсіресе Германиядан келетін көмекті жоғары бағалап, Берлинді Украинаның Еуропадағы ең ірі стратегиялық серіктесі деп атады. Оның айтуынша, Германия Украинаға АҚШ-қа қарағанда көбірек көмек көрсетіп отыр.
Зеленский Украина Қарулы күштерінде, әсіресе Patriot әуе қорғаныс жүйелеріне қатысты үлкен тапшылық бар екенін де атап өтті. Сондай-ақ ол Украина Еуроодаққа мүше болуды басты мақсаттарының бірі ретінде көретінін, ал НАТО-ға кіру мәселесі күрделірек екенін жеткізді.