Израиль шабуылы нәтижесінде «Хезболланың» баспасөз хатшысы қаза тапты
Ливандағы «Хезболла» тобының баспасөз хатшысы Мохаммад Афиф Израильдің Бейрутке жасаған шабуылында қаза тапты.
Бұл туралы CNN хабарлады.
Басылым Reuters ақпарат көздеріне сілтеме жасап, Афифтің Ливан астанасының орталығына жасалған шабуылда қаза тапқанын жазды. Шабуылдың нысанасы Рас-ән-Набадағы Баас партиясының штаб-пәтері болды. Шабуыл кезінде партия жетекшісі Әли Хиджази ғимаратта болмаған.
Афиф «Хезболла» мүшесі, баспасөзге жауапты. Әл-Жазираның хабарлауынша, ол сонымен бірге топтың қаща тапқан бас хатшысы Хасан Насрулланың кеңесшісі болған. Бұрын Мұхаммед Афиф «Әл-Манар» телеарнасының бас директоры қызметін атқарған және Ливандағы журналистік ортада танымал еді.
Израиль армиясы Бейруттың Рас-ән-Наба аймағындағы соққыға қатысты түсініктеме бермеді.