Канаданың экс-сенаторы: Құрылтай депутаттарының сайлауы Қазақстанның одан әрі саяси және конституциялық дамуы үшін ерекше маңызға ие

 Канаданың экс-сенаторы Виктор Оудың пікірінше, жаңа өкілді органды қалыптастыру өкілді институттарды нығайтуға ықпал етеді, ал азаматтардың жауапты қатысуы жүргізіліп жатқан өзгерістерді нақты мазмұнмен толықтырады.

Сайлау жаңа конституциялық жүйе аясында жұмысын бастайтын Құрылтайдың алғашқы құрамын айқындайды. Алдағы дауыс берудің маңызын парламенттік қызмет тәжірибесі бар және Қазақстанмен тікелей таныс шетелдік саясаткерлер мен сарапшылар да атап өтуде.

Виктор Оу Канада сенаторы қызметін атқарып, Канада Парламентіндегі Қазақстан-Канада достық тобын басқарған. Ол көптеген жыл бойы екіжақты байланыстарды дамытуға атсалысты, ал 2022 жылғы қарашада президенттік сайлауға халықаралық байқаушы ретінде Қазақстанға келді.

Жеке тәжірибе және сайлау процесіне жоғары баға

Виктор Оудың Қазақстанға деген көзқарасы көпжылдық ынтымақтастық пен елді жақыннан танып-білуге негізделген. Халықаралық байқаушы ретінде қатысу оған сайлау процесінің ұйымдастырылуын және қазақстандықтардың дауыс беруге жауапкершілікпен қарайтынын өз көзімен көруге мүмкіндік берді.

«Қазақстан өткен жылдар ішінде айтарлықтай жетістіктерге қол жеткізді. Мен екі ел арасында қалыптасқан берік достықты әрдайым жоғары бағаладым. 2022 жылғы қарашада Қазақстандағы президенттік сайлауға халықаралық байқаушы ретінде қатысу құрметіне ие болдым. Бұл сайлау комиссиялары мүшелерінің жоғары кәсібилігін және Қазақстан халқының азаматтық жауапкершілігінің жоғары екенін өз көзіммен көруге берілген құнды мүмкіндік болды. Осы тәжірибе елдің тарихын, мәдениетін және мақсат-мұратын тереңірек бағалауыма көмектесті», - деді Виктор Оу.

Алған әсерлері оның алдағы сайлау науқанына жоғары баға беруіне негіз болды. Канадалық саясаткер Қазақстанның жинақтаған тәжірибесі жаңа Құрылтай депутаттарының алғашқы сайлауын ұйымдасқан түрде өткізуге ықпал ететініне сенім білдірді.

Құрылтайдың алғашқы құрамы және азаматтардың жауапкершілігі

23 тамыздағы сайлаудың ерекше маңызы жаңа конституциялық жүйеге сәйкес құрылған өкілді органның қалыптасуымен байланысты. Құрылтайдың алғашқы құрамы жаңартылған парламенттік модельді практикалық тұрғыда іске асырып, елдің заңнамалық күн тәртібін қалыптастыруға қатысады.

«Қазіргі сайлаудың маңызы ерекше. Өйткені ол Қазақстанның жаңа конституциялық жүйесіне сәйкес жаңадан құрылған Құрылтай депутаттарын сайлау үшін алғаш рет өткізіледі. Бұл Қазақстанның одан әрі саяси және конституциялық дамуындағы, сондай-ақ өкілді билік институттарын нығайтудағы маңызды белес», - деп атап өтті экс-сенатор.

Алдағы сайлаудың институционалдық маңызымен қатар, Виктор Оу сайлаушылардың өз рөліне де назар аударды. Азаматтардың белсенді қатысуы Құрылтай құрамына тікелей ықпал етіп, келесі парламенттік кезеңде олардың мүддесін қандай саяси күштер білдіретінін айқындауға мүмкіндік береді.

«Әрбір сайлау - азаматтардың белсенді қатысуы арқылы өз елінің болашағын қалыптастыруға үлес қосу мүмкіндігі. Мен сапарым кезінде куә болғандай, Қазақстан халқы бұл маңызды оқиғада да сондай жауапкершілік пен адалдық танытатынына сенімдімін», - деді Виктор Оу.

Азаматтардың жауапты таңдауы жаңа өкілді орган жұмысының маңызды негізіне айналады. Дауыс беру қорытындысы бойынша қалыптасқан Құрылтай заң шығару міндеттерін жүзеге асыруға және мемлекеттік институттар мен қоғам арасындағы өзара іс-қимылды одан әрі нығайтуға қоғамдық мандат алады.

Қазақстан мен Канада ынтымақтастығы үшін жаңа мүмкіндіктер

Виктор Оу сайлаудың табысты өтуін Қазақстанның халықаралық байланыстарын одан әрі нығайтумен де байланыстырды. Қазақстан-Канада диалогына ұзақ жылдар бойы қатысқан ол екі ел арасындағы достық пен өзара тиімді ынтымақтастықты кеңейтуге мүдделі екенін білдірді.

«Қазақстанның көптен бергі досы ретінде сайлаудың сәтті өтуін, сондай-ақ Қазақстанға бейбітшілік, өркендеу және одан әрі даму тілеймін. Алдағы жылдары Қазақстан мен Канада арасындағы достық пен ынтымақтастықтың одан әрі нығаюын асыға күтемін. Қазақстан халқына бар жақсылықты тілеймін», - деп түйіндеді Виктор Оу.

Канадалық саясаткердің пікірі Құрылтай депутаттарының алғашқы сайлауы елдің ішкі дамуы үшін де, оның шетелдік серіктестермен өзара іс-қимылы үшін де маңызды екенін көрсетеді. Азаматтардың жауапты қатысуы мен жаңа өкілді органның табысты қалыптасуы конституциялық реформаларды іске асырудың практикалық кезеңін бастап, Қазақстан мен Канада ынтымақтастығын нығайтуға қосымша мүмкіндіктер жасайды.