Қазақстан әлемдік интернет жылдамдығы рейтингінде позициясын жоғалтып жатыр
Қазақстан мобильді интернет жылдамдығы бойынша әлемдік Speedtest by Ookla рейтингінде төмендеуді жалғастырып келеді.
Бұл туралы Energyprom.kz сарапшылары мәлімдеді.
2026 жылдың мамыр айында елдегі мобильді интернеттің медианалық жылдамдығы 88,11 Мбит/с болды. Қаңтарда бұл көрсеткіш 100,2 Мбит/с еді. Осылайша Қазақстан бес ай ішінде алты сатыға төмендеп, 101 елдің ішінде 56-орынға түсті.
Әлемде керісінше мобильді интернеттің орташа жылдамдығы өсіп келеді. Мамыр айында жаһандық көрсеткіш 113,16 Мбит/с-қа жетіп, Қазақстан мен әлемдік орташа деңгей арасындағы айырмашылық 25 Мбит/с-тан асты.
Елдің ірі қалаларында да төмендеу байқалады. Алматыда мобильді интернет жылдамдығы жыл басынан бері 22%-ға азайып, қала әлемдік рейтингте 60-орыннан 84-орынға сырғыды. Астанада мамырда аздаған өсім тіркелгенімен, қаңтармен салыстырғанда жалпы көрсеткіш 17,4%-ға төмендеп, елорда 62-орыннан 79-орынға түсті.
Қазақстан әзірге Орталық Азияда көш бастап тұрғанымен, көрші елдер қарқынды ілгерілеп келеді. Мәселен, Өзбекстанда мобильді интернет жылдамдығы жыл басынан бері 16,3%-ға, ал Ташкентте 27,2%-ға артқан.
Сарапшылар қазіргі үрдіс сақталса, Қазақстан өңірдегі цифрлық көшбасшылық орнынан айырылып, қуып жетуші елдердің қатарына қосылуы мүмкін екенін ескертеді.