Қазақстан Каспийдегі мұнай-газ нысандарын терроризм қаупінен қорғауды күшейтеді
Қазақстан Каспий теңізіндегі мұнай-газ нысандарының террористік қауіптерден қорғалуын күшейтпек.
Жаңа талаптарға сәйкес, теңіздегі өндірістік объектілердің маңында терроризмге қарсы күрес жөніндегі жедел штаб күштерін орналастыруға арналған алаңдар дайын болуы тиіс.
Қажет болған жағдайда жедел штабты жылжымалы теңіз платформасында да орналастыруға мүмкіндік қарастырылған. Бұл шара теңіздегі стратегиялық маңызы бар нысандарға төнетін қауіпке жедел ден қоюға бағытталған. Жаңа ережелер бойынша антитеррористік топтың құрамында кемінде 10 адам болуы керек. Сонымен қатар нысан маңында тікұшақ қонатын арнайы алаң қарастырылуы тиіс. Оның мұнай-газ объектісіне дейінгі қашықтығы 23 шақырымнан аспауы қажет.
Мұндай талаптарды орындауға байланысты барлық шығын мұнай-газ нысандарының иелері мен оларды басқаратын компанияларға жүктеледі.
Жаңа тәртіп Каспийдегі мұнай-газ инфрақұрылымының қауіпсіздігін күшейтіп, ықтимал террористік қатер туындаған жағдайда арнайы қызметтердің әрекет етуіне қажетті жағдай жасауға бағытталған.