Қазақстанда белсенді Нұржан Сембаев алты жылға бас бостандығынан айырылды
Шығыс Қазақстандағы Семей қаласының қылмыстық істер жөніндегі ауданаралық соты азаматтық белсенді Нұржан Сембаевты экстремистік ұйымның қызметіне қатысу және оны қаржыландыру баптары бойынша кінәлі деп танып, алты жылға бас бостандығынан айырды.
Бұл туралы «АктивистыНеЭкстремисты» құқық қорғау тобы хабарлады.
Сот 42 жастағы Сембаевты Қылмыстық кодекстің 405-бабының 2-бөлігі («Экстремистік ұйым қызметіне қатысу») және 258-бабының 1-бөлігі («Экстремистік қызметті қаржыландыру») бойынша кінәлі деп таныды. Сондай-ақ оған бостандыққа шыққаннан кейін үш жыл бойы қоғамдық-саяси қызметпен айналысуға тыйым салынды.
Бұдан бөлек, сот белсендіні сараптамалар жүргізуге кеткен сот шығындарын өтеу үшін мемлекетке шамамен 1,7 миллион теңге төлеуге міндеттеді.
Құқық қорғаушылардың мәліметінше, соңғы сөзінде Сембаев өз әрекетінде қылмыс оқиғасы да, қылмыс құрамы да жоқ екенін айтып, өзін толық ақтауды сұраған.
Нұржан Сембаев биыл 3 ақпанда жұмыс орнында ұсталған. Оның серіктерінің айтуынша, өзі жұмыс істеген дүкенге арнайы жасақ қызметкерлері бетпердемен кіріп, кейін белсендіні тергеу изоляторына алып кеткен. Ұсталған күннен бері ол қамауда болды.
Бұған дейін «Настоящее Время» танысқан айыптау актісіне сәйкес, қылмыстық істің қозғалуына Сембаевтың Facebook әлеуметтік желісіндегі жарияланымдары мен репосттары негіз болған. Тергеу нұсқасы бойынша, ол 2025 жылдың соңынан бастап Қазақстанда экстремистік ұйым деп танылған «Қазақстанның демократиялық таңдауы» (ҚДТ) қозғалысына ақпараттық қолдау көрсеткен. Ал Еуропалық одақтың бірқатар қарарларында бұл қозғалыс бейбіт оппозиция ретінде сипатталған.
Сараптамаға жіберілген материалдардың арасында құқық қорғаушы Бақытжан Төреғожинаның сатиралық Qaznews24 паблигінің негізін қалаушы Темірлан Еңсебекті қолдау акциясы туралы жазбасын бөліскені де болған. Ол кезде Еңсебек ұлтаралық араздықты қоздыру ісі бойынша қамауда отырған.
Сембаевтың ісі – тыйым салынған ұйымның қызметіне қатысты айыптармен қаралған кезекті сот процесі. Бұған дейін, 2024 жылы, дәл осы баптар бойынша журналист Думан Мұхамедкәрім жеті жылға сотталған еді. Осындай айыптармен тіркелмеген «Алға, Қазақстан» оппозициялық партиясының жетекшісі, супермарафоншы Марат Жыланбаев пен партияны құру жөніндегі бастамашыл топ мүшесі Амангелді Жахин де жеті жылға бас бостандығынан айырылған.