Қазақстанда Қауіпсіздік кеңесінің аппараты құрылды – Тоқаев жарлыққа қол қойды
Қазақстан Президенті Қасым-Жомарт Тоқаев «Қазақстан Республикасының мемлекеттік басқару жүйесін одан әрі жетілдіру жөніндегі шаралар туралы» жарлыққа қол қойды.
Жарлыққа сәйкес, Қазақстан Республикасы Қауіпсіздік кеңесінің аппараты құрылды. Ол Президентке тікелей бағынатын және есеп беретін мемлекеттік орган болады.
Қауіпсіздік кеңесі – ұлттық қауіпсіздікті қамтамасыз ету, елдің қорғаныс қабілетін нығайту және егемендігін қорғау саласындағы бірыңғай мемлекеттік саясатты үйлестіретін конституциялық алқалы орган. Қауіпсіздік кеңесінің төрағасы қызметін Қазақстан Президенті атқарады.
Бұған дейін Құрылтайдың I шақырылымының алғашқы сессиясында Қасым-Жомарт Тоқаев Қауіпсіздік кеңесі төрағасының орынбасары деген жаңа лауазым енгізілетінін айтқан.
«Құрылтайдың құрылымы жасақталғаннан кейін депутаттардың қарауына вице-президент пен премьер-министрдің кандидатураларын енгіземін. Одан кейін сіздермен консультация өткізіп, Үкімет мүшелерін тағайындаймын. Сонымен қатар Қауіпсіздік кеңесі төрағасының орынбасары деген жаңа лауазымға тағайындау жасалады», – деді Президент.
Айта кетейік, 20 тамызда Қасым-Жомарт Тоқаев Қауіпсіздік кеңесінің отырысын өткізіп, стратегиялық маңызы бар материалдар саласын, соның ішінде сирек және сирек кездесетін металдар өндірісін дамыту мәселелерін талқылаған.