Қазақстандағы жеке арал 10 млн долларға сатылымға шықты
Шығыс Қазақстан облысындағы Бұқтырма су қоймасында орналасқан жеке арал 10 млн долларға сатуға шығарылды.
Бұл туралы Курсив басылымы хабарлады.
Брокерлік агенттік жариялаған суреттерді карта деректерімен салыстырғанда, сөз Үлкен Қаз аралы туралы болып отырғаны анықталған.
Аралдың жалпы аумағы – 225 гектар. Онда әзірге ешқандай құрылыс нысаны жоқ. Кадастрлық құны шамамен 1 млн 606 мың теңге, алайда бұл тек салық пен есепке алу үшін белгіленген баға, нарықтық құнын білдірмейді.
Мәліметке сәйкес, аралдағы төрт жер телімі «Мұхит-Бура» компаниясына тиесілі. Компанияның алғашқы басшысы әрі жалғыз құрылтайшысы – Исатай Қайырғазы.
Adata деректеріне қарағанда, Исатай Қайырғазы Altay Polymetal компаниясымен байланысты. Қазір бұл кәсіпорынды Қайрат Қайырғазы басқарады. Ал олардың әкесі Сәбет Мұхитов – «Өскемен полиметалл концентраттары зауыты», «Сибмодель» және Ecosilicon компанияларының құрылтайшысы.