Қазақстанның үш өңірі су тасқынының шарықтау шегінен аман-есен өтті
Актөбе, Қостанай және Батыс Қазақстан облыстарында су тасқынының шарықтау шегі артта қалды. Бұл туралы ҚР Су ресурстары және ирригация министрлігінің баспасөз қызметі мәлімдеді.
Ведомствоның мәліметінше, қазіргі уақытта елдің солтүстік, шығыс және орталық өңірлеріндегі ірі су қоймаларынан су белсенді түрде жіберіліп жатыр. Бұл тасқын суларын қабылдап, қауіпсіз өткізу үшін қажет.
Атап айтқанда:
Ақмола облысында Астаналық су қоймасынан секундына 53 текше метр, Сілеті су қоймасынан — 41,7 текше метр, ал Шағылы су қоймасынан — 7,5 текше метр су жіберілуде.
Шығыс Қазақстан облысында Өскемен су қоймасынан — 450 текше метр, Бұқтырма су қоймасынан — 465 текше метр су ағып жатыр.
Абай облысында Шүлбі су қоймасынан секундына 2100 текше метр су жіберілуде.
Қарағанды облысында Интұмақ су қоймасынан — 8 текше метр, Самарқан су қоймасынан — 2 текше метр.
Ұлытау облысында Кеңгір су қоймасынан — 81,4 текше метр.
Солтүстік Қазақстан облысында Сергеев су қоймасынан — 643,3 текше метр, Петропавл су қоймасынан — 1348 текше метр су жіберіліп жатыр.
Министрлік жағдайды бақылауда ұстап отыр және барлық қажетті шаралар қабылданып жатқанын атап өтті.