Қырғызстанда Тәшиев ісіне қатысты сот қайтадан жабық өтуі мүмкін
Қырғызстан астанасы Бішкектегі Бірінші май аудандық сотында Камчыбек Тәшиев ісі бойынша өткен кезекті сот отырысында журналистердің көптігіне байланысты мәселелер туындады.
Процеске қатысушылардың айтуынша, БАҚ өкілдерінің шамадан тыс жиналуы айыпталушыларға еркін қозғалуына кедергі келтіріп, сот отырысының уақытында басталуына әсер еткен.
Судья Азирет Медеров те жағдайға наразылық білдіріп, сот залына кірудің өзі қиын болғанын мәлімдеді. Осыған байланысты бірнеше адвокат сот процесін қайтадан жабық режимде өткізуді ұсынды. Олардың пікірінше, бұл сот тәртібін қамтамасыз етуге мүмкіндік береді. Отырыстан кейін судья журналистермен сот процесін жариялау тәртібін бөлек талқылау туралы шешім қабылдады.
Еске салайық, аталған іс Қырғызстанның бұрынғы жоғары лауазымды тұлғаларына қатысты қозғалған. Олардың қатарында экс-Ұлттық қауіпсіздік мемлекеттік комитетінің төрағасы Камчыбек Тәшиев пен бірқатар бұрынғы шенеуніктер бар. Айыптау тарапы оларды билікті күшпен басып алуға әрекеттенді деп айыптап отыр. Бұған дейін бұл іс бойынша құпиялылық мәртебесі алынып тасталып, сот отырыстарына журналистердің қатысуына рұқсат берілген болатын.
Қазір соттың алдағы отырыстарының ашық немесе жабық форматта өтетіні туралы мәселе қарастырылып жатыр.