Қырғызстандағы сайлау: Садыр Жапаровқа жақын кандидаттар округтердің басым бөлігінде жеңіске жетті

 Бұл туралы Reuters агенттігі және жергілікті БАҚ хабарлады.

30 қарашада өткен Жогорку Кеңеш сайлауының алғашқы деректері бойынша, Жапаровтың жақтастары жеңіске жеткен. 90 мандаттың шамамен 50-і бұрынғы шақырылым депутаттарына тиесілі болуы мүмкін (24.kg дерегі).

Көптеген кандидаттар дербес ретінде ұсынылған. Жергілікті медиада жарияланған алдын ала тізімдерде кандидаттардың тек аты-жөні көрсетілген.

Неліктен парламент өзін таратты?

Жогорку Кеңеш 25 қыркүйекте өзін тарату туралы шешім қабылдаған. Себептері:

• жоспар бойынша парламент сайлауы 2026 жылдың қарашасында, президенттік сайлаудан екі ай бұрын өтуі тиіс еді;

• екі маңызды саяси процестің қысқа уақытта қатар өтуі тұрақсыздық қаупін күшейтеді деген уәж айтылған.

Сайлау жүйесіндегі өзгерістер

2025 жылдың маусымында президент бекіткен өзгерістер бойынша, бұрын 90 депутаттың 36-сы  бірмандатты округтардан, 54-і партиялық тізіммен сайланатын, жаңа жүйе бойынша ел 30 округке бөлінген, әр округтан 3 депутат сайланады, олардың ішінде кемінде біреуі  әйел болуға тиіс.

Билік партиялық жүйеден бас тартуды:

• саяси жемқорлықпен күресу,

• сайлау жүйесіндегі кемшіліктерді жою,

• қоғамның депутаттарға деген сенімін арттыру

деген уәжбен түсіндірген.

Сайлауға бір апта қалғанда Қырғызстанның құқық қорғау органдары оппозиция өкілдерін ұстады. Олардың қатарында – «Социал-демократтар» партиясының мүшелері Темирлан Султанбеков пен Эрмек Эрматов, экс-президент Алмазбек Атамбаевтың ұлы Қадырбек Атамбаев және тағы бірнеше белсенді бар.

Қырғызстан ІІМ мәлімдемесі бойынша, бұл тұлғалар «сайлау нәтижелері жарияланғаннан кейін елде митингтер ұйымдастырып, қоғамдық толқулар туғызуды жоспарлаған».