Қырғызстанның экс-президенті Алмазбек Атамбаевтың ұлының қамау мерзімі ұзартылды
Бішкектің Бірінші май аудандық соты билікті күшпен басып алуға әрекет жасау және жаппай тәртіпсіздік ұйымдастыру ісі бойынша айыпталған бірқатар саясаткер мен белсендінің қамауда ұстау мерзімін тағы екі айға ұзартты.
Шешім 19 тамызда қабылданған. Бұл туралы адвокат Асель Аргымбаева хабарлады.
Іс бойынша күдіктілер қатарында «Социал-демократтар» партиясының жетекшісі Темирлан Сұлтанбеков, Қырғызстанның бұрынғы президенті Алмазбек Атамбаевтың ұлы Қадырбек Атамбаев, бұрынғы депутат Кубанычбек Кадыров, Атамбаевтың бұрынғы оққағары Дамир Мусакеев, белсенді Тұрсынбай Шарапов, экс-депутат Шайлообек Атазов, кәсіпкер Урмат Барктабасов және тағы бірнеше адам бар.
Саяси тұлғаларды жаппай ұстау 2025 жылғы 22 қарашада болған. Сол кезде Қырғызстан Ішкі істер министрлігі күдіктілер Жогорку Кенеш сайлауынан кейін жаппай тәртіпсіздік ұйымдастыруды жоспарлаған деп мәлімдеген.
Ведомствоның хабарлауынша, тінту барысында қару-жарақ, оқ-дәрілер, гранаталар, байланыс құралдары, болжамды тәртіпсіздіктерді қаржыландыруға қатысты құжаттар, есірткі және 150 мың доллар қолма-қол ақша тәркіленген.
Кейін 150 мың доллардың «Бүтүн Кыргызстан» партиясының жетекшісі Адахан Мадумаровқа тиесілі екені белгілі болды. Саясаткер ақшаның отбасына тиесілі екенін және ІІМ қызметкерлері оны заттай дәлел ретінде тәркілегенін мәлімдеді. Мадумаровтың өзі іс бойынша куәгер ретінде жауап берген.
Айыпталушылардың барлығы өздеріне тағылған айыптарды жоққа шығарады.
Бұған дейін іс фигуранттарының бір бөлігі қамаудан босатылған. Қаңтарда Кубанычбек Кадыров пен Шайлообек Атазов үйқамаққа ауыстырылса, шілдеде Дамир Мусакеев ешқайда кетпеу туралы қолхатпен босатылды. Қалған айыпталушылар Бішкектегі №1 тергеу изоляторында отыр.
Адвокат Асель Аргымбаеваның айтуынша, Атазов, Барктабасов және Мусакеевке қатысты материалдар жеке өндіріске бөлінген. Негізгі істі Бішкектің Бірінші май аудандық соты қарауды жалғастырып жатыр.