Қостанайда 9 млн теңге заңсыз сыйақы алған күдікті ұсталды
Қостанай облысында денсаулық сақтау объектілерін салу кезінде заңсыз сыйақы алу фактісі анықталды. Бұл туралы Қаржылық мониторинг агенттігі хабарлады.
Авторлық қадағалау тобының басшысы бопсалау арқылы орындалған жұмыс және пайдалануға беру актілеріне кедергісіз қол қойғаны үшін «Ауылдық денсаулық сақтауды жаңғырту» ұлттық жобасы шеңберінде дәрігерлік амбулатория салатын компанияның бас инженерінен 9 000 000 теңге мөлшерінде заңсыз сыйақы алған, делінген хабарламада.
Тергеу барысында күдікті қолма-қол ақша алу кезінде ұсталды. Заңсыз сыйақы мөлшері көрсетілген объектілерді салу құнының жалпы сомасының 1% — құрайды.
Сотқа дейінгі тергеу жалғасып жатыр.