КТК теңіз терминалындағы екі танкерге дронмен шабуыл жасалды
Каспий құбыр консорциумы теңіз терминалында мұнай жөнелту операциясы жүріп жатқан кезде екі танкерге ұшқышсыз ұшу аппараттары шабуыл жасағанын мәлімдеді.
Оқиға 19 шілдеде ВПУ-1 және ВПУ-3 қалқымалы кешендері пайдаланылып жатқан сәтте болған. Консорциумның хабарлауынша, шабуыл кезінде ASIA танкері «Теңізшевройл» өндірген мұнайды қабылдап жатқан. Ал NISSOS IOS кемесіне Қашаған кен орнынан өндірілген және «Матен» АҚ қатысатын мұнай тиеу жұмыстары жүргізілген. Екі кеме де халықаралық теңіз қатынасында қолданылатын шетелдік тулармен жүзген және олардың экипажы бірнеше елдің азаматтарынан құралған. Шабуыл салдарынан ASIA танкерінің палуба бөлігінде өрт шыққан.
Апаттық-құтқару бөлімшелері жедел әрекет етіп, жалынның кеңеюіне мүмкіндік бермей, қысқа уақыт ішінде толық сөндірген. Осылайша тиеу кешенінің басқа элементтеріне қауіп төнуіне жол берілген жоқ. Алдын ала жүргізілген тексерулерге сәйкес, оқиға кезінде адамдардың өмірі мен денсаулығына зиян келмеген. Экипаж мүшелерінің ешқайсысы жарақат алмаған, медициналық көмек сұрамаған. Сондай-ақ теңізге мұнайдың ағуы тіркелмеген, бұл экологиялық тәуекелдің алдын алуға мүмкіндік берді. Қауіпсіздік талаптарына сәйкес мұнай тиеу жұмыстары уақытша тоқтатылып, терминалдағы барлық технологиялық жүйеге қосымша диагностика жүргізіле бастады.
Мамандар кемелердің техникалық жағдайын, тиеу құрылғыларының жарамдылығын және келген материалдық шығын көлемін бағалап жатыр. Каспий құбыр консорциумы бұл оқиғаны жекелеген кәсіпорынға қарсы жасалған әрекет ретінде ғана емес, халықаралық энергетикалық инфрақұрылымның тұрақтылығына төнген қауіп ретінде бағалайды. Компанияның пікірінше, әлемдік нарыққа мұнай жеткізуді қамтамасыз ететін азаматтық нысандарға шабуыл жасау халықаралық құқық нормаларына қайшы келеді және жаһандық энергетикалық қауіпсіздікке теріс әсер етуі ықтимал. Консорциум құрамына Қазақстан, Ресей, АҚШ және бірнеше еуропалық мемлекеттің энергетикалық компаниялары кіретіндіктен, теңіз терминалының үздіксіз жұмысы көптеген халықаралық серіктестер үшін стратегиялық маңызға ие.
Осыған байланысты КТК оқиғаның барлық мән-жайын анықтап, инфрақұрылымның қауіпсіздігін күшейту бағытындағы жұмыстарды жалғастырып жатқанын мәлімдеді. Қазіргі уақытта оқиғаның себептері мен келтірілген залалға қатысты кешенді бағалау жүргізіліп жатыр. Терминалдың қалыпты жұмыс режиміне қашан оралатыны сараптама аяқталғаннан кейін белгілі болады.