Латвия Ресей мен Беларусьтен кітаптар мен ойыншықтарды импорттауға тыйым салуды мақұлдады
Латвия парламенті (Сейм) кезектен тыс отырыста Ресей мен Беларусьтен жекелеген тауарларды импорттауға тыйым салатын заңға енгізілген түзетулерді қабылдады.
Бұл туралы 23 шілдеде хабарланды.
Құжатты Латвияның Сыртқы істер министрлігі әзірлеген, ал үкімет оны 14 шілдеде мақұлдаған. Дауыс беру нәтижесінде 66 депутат қолдап, сегізі қарсы дауыс берді, тағы сегіз депутат дауыс беруге қатысқан жоқ.
Тыйым салынатын тауарлар қатарына негізінен орыс тіліндегі кітаптар мен мерзімді басылымдар, бейнеойындар, спорт тауарлары, ойыншықтар, киім-кешек және аяқ киім кіреді. Ресей мен Беларусь өнімдерін бұл елдерден тікелей де, үшінші мемлекеттер арқылы да әкелуге болмайды. Алайда Латвия аумағы арқылы Еуроодақтың басқа елдеріне транзитпен тасымалдауға рұқсат етіледі.
Түзетулер «Украинаның азаматтық тұрғындарын қолдау туралы» заңға енгізілді.
Басты мақсат – саяси белгі беру
Латвия билігінің айтуынша, бұл шешім ең алдымен «саяси белгі» беруге бағытталған. Үкімет 2027 жылғы 1 наурызға дейін және одан кейін жыл сайын бұл тыйымның қоғам қауіпсіздігіне және Украинаға қолдау көрсету мақсатына қаншалықты сай келетінін бағалап отырады.
Сонымен бірге Латвия Экономика министрлігі бұл тыйымның тиімділігіне күмән келтірген. Ведомствоның пікірінше, егер мұндай тауарларды ел ішінде сатуға қосымша шектеулер енгізілмесе, тыйым толық нәтиже бермеуі мүмкін. Сондай-ақ Ресейде немесе Беларусьте өндірілген өнім Еуроодақтың басқа бір мемлекетінде еркін айналымға шығарылған болса, ЕО-ның бірыңғай нарық қағидаларына сәйкес оны Латвияға әкелуге мүмкіндік сақталады.
Ресей мен Беларусь импорты айтарлықтай қысқарған
2022 жылдан бері Латвияның Ресей мен Беларусьтен импорты 91%-ға азайды. Егер 2022 жылы импорт көлемі 2,1 млрд еуродан асса, 2025 жылы бұл көрсеткіш 193 млн еуроны немесе елдің жалпы импортының 0,8%-ын ғана құрады.
Ал кітаптар, мерзімді басылымдар, бейнеойындар, спорт тауарлары, ойыншықтар, киім және аяқ киім санатындағы өнімдер Ресей мен Беларусьтен келетін импорттың шамамен 6,5%-ын, яғни Латвияның жалпы импортының небәрі 0,05%-ын құрайды.