Маңғыстауда екі сотталушы бейнебақылау камераларын сындырғаны үшін тағы бір жылға сотталды
Бұл туралы Lada.kz хабарлады.
Маңғыстау облысындағы № 77 мекемеде жазасын өтеп жатқан екі сотталушы үш бейнебақылау камерасын қасақана істен шығарған. Сот олардың әрқайсысына негізгі жазасына қосымша тағы бір жыл түрме мерзімін тағайындады.
Маңғыстау облысы бойынша Қылмыстық-атқару жүйесі департаментінің мәліметінше, алғашқы жағдайда сотталушылардың бірі камераны қолымен ұрып, кейін оны жалғап тұрған сымдарымен бірге жұлып алған. Соның салдарынан құрылғы толық жарамсыз күйге түскен.
Ал екінші сотталушы бірден екі камераны зақымдаған. Ол құрылғыларды қосалқы бөлшектерімен және жалғаушы сымдарымен қоса жұлып тастаған.
Осы әрекеттердің нәтижесінде мекеме үш бейнебақылау камерасынан айырылған.
Сот екі оқиғаны жеке қарап, құқық бұзғандарға қосымша жаза тағайындады. Бұған дейін белгіленген бас бостандығынан айыру мерзіміне әрқайсысына тағы бір жылдан қосылды. Сонымен қатар сотталушылардан бүлінген мүліктің материалдық шығыны өндірілді.
Мекеме әкімшілігі мүлікті қасақана бүлдіру заң бойынша жауапкершілікке әкелетінін еске салды.