Мелони Тоқаевқа алғыс айтып, Қазақстанмен ынтымақтастықты нығайтуға ниетті екенін мәлімдеді

Мелони бұл туралы X әлеуметтік желісіндегі парақшасында жазды. Бұған дейін Қасым-Жомарт Тоқаев Италия премьер-министрін оның үкіметі Италия Республикасы тарихындағы ең ұзақ қызмет еткен үкімет атануымен құттықтаған еді.

«Президент Қасым-Жомарт Тоқаевқа жоғары бағасы мен кездесулерімізге әрдайым тән болған шынайы достығы үшін алғыс айтамын», – деп жазды Мелони.

Италия премьер-министрі Тоқаевты болашаққа бағытталған стратегиялық көзқарасы бар көшбасшы деп атап, онымен бірге жұмыс істеу үлкен мәртебе екенін жеткізді.

«Біз Италия мен Қазақстан арасындағы қарым-қатынасты бірге нығайтып, энергетика мен аса маңызды минералдық ресурстардан бастап, жоғары білім саласындағы ынтымақтастыққа дейін жаңа стратегиялық мүмкіндіктерге жол ашып келеміз», – деді ол.

Мелони екі мемлекет алдағы уақытта да осы бағыттағы жұмысты жалғастыратынын айтты.

«Халықтарымыздың өсіп-өркендеуі мен әл-ауқаты үшін осы жолды жалғастырамыз», – деп жазды Италия үкіметінің басшысы.

Айта кетейік, Тоқаев өзінің құттықтауында Мелонидің «парасатты әрі мықты көшбасшылығы» мен Италияның ұлттық мүддесі мен абыройын қорғаудағы табандылығына жоғары баға берген.