Мемлекеттік қызметке орналасарда жақын туыстары туралы мәлімет тексеріледі
Сенатта сыбайлас жемқорлыққа қарсы заңнама аясында мемлекеттік қызметке қабылдау кезінде бейресми байланыстардың қалай ескерілетіні түсіндірілді.
28 мамыр күні Сенат бірінші оқылымда сыбайлас жемқорлыққа қарсы іс-қимыл туралы заң жобасын мақұлдады. Құжатта мемлекеттік қызметке орналасатын азаматтарды жақын туыстары туралы мәлімет ұсынуға міндеттеу қарастырылған. Жаңа декларацияға олардың ЖСН-і, туыстық байланыстары және мүдделер қақтығысына қатысты ақпарат енгізілуі мүмкін.
Журналистер Сенат кулуарында тек туыстар ғана емес, достар мен жақын адамдарды қызметке тарту мәселесі қалай бақыланатынын сұрады.
«Қазақстанда достарын, достарының балаларын, екінші, үшінші, төртінші әйелдерін немесе көңілдестерін жұмысқа орналастыру тәжірибесі бар. Мұндай жағдайлар қалай тексеріледі?» — деп сауал қойды БАҚ өкілдері.
Сенатор Андрей Лукин заңда мұндай ұғымдардың нақты қарастырылмағанын айтты.
«Заңнамада “дос”, “жолдас” деген анықтамалар жоқ», — деді ол.
Оның сөзінше, заңда «байланысты тұлғалар» деген түсінік бекітілген. Оған жақын туыстар және өзге де бірқатар санаттар кіреді.