НАТО әскери ұшағы Литва аспанында дронды атып түсірді
НАТО күштері Литва әуе кеңістігіне кірген дронды атып түсірді. Оқиға елдің орталық бөлігінде болған.
Литва билігі одақтастарына жедел әрекет еткені үшін алғыс айтып, қазіргі жағдайда әскери дайындықтың маңызы артып отырғанын мәлімдеді.
Литва президенті Гитанас Науседа 15 қыркүйек күні таңертең X әлеуметтік желісінде:
«Литва әуе кеңістігіне жаңа ғана кірген дронды НАТО жойғыштары атып түсірді», – деп жазды.
Ол Ресейдің Украинаға қарсы агрессиясы күшейіп отырған шақта мұндай әскери дайындықтың аймақ қауіпсіздігі үшін аса маңызды екенін атап өтті.
Литва сыртқы істер министрі Кястутис Будрис те оқиғадан кейін НАТО-дағы одақтастарына алғыс білдірді. Оның айтуынша, әуе кеңістігіне кірген дрон жедел түрде жойылған.
«Бұл – одақтастардың бірлігі мен батылдығының нақты көрінісі. Сондай-ақ НАТО-ның қырағылығын сақтап, өз міндеттемелеріне берік екенін және әрекет етуге дайын екенін көрсететін айқын белгі», – деді министр.
Литваның LRT қоғамдық телерадиокомпаниясы мемлекеттік Дағдарыстарды басқару орталығына сілтеме жасап, дронның Беларусь жағынан ұшып келгенін хабарлады. Ол елдің орталық бөлігіндегі Каунас су қоймасына жақын ауылдық аумаққа құлаған.
Польша да жойғыштарын әуеге көтерді
Осы уақытта Польша Украина аумағына шабуыл жасап жатқан ресейлік реактивті дрондардың белсенділігіне байланысты өз әуе кеңістігінде «әуе операцияларын» бастағанын мәлімдеді.
Варшава бұл шаралардың алдын алу мақсатында қабылданғанын және әсіресе қауіпті аймақтармен шектесетін өңірлердегі әуе кеңістігінің қауіпсіздігін қамтамасыз етуге бағытталғанын хабарлады.
Ресей Украинаға қарсы кең ауқымды соғыс бастағаннан бері Балтық елдері өздерінің әуе кеңістігіне дрондардың бірнеше рет кіргенін мәлімдеген. Биыл мамырда Вильнюс аспанында дрон пайда болып, соғыс басталғалы бері алғаш рет Литва астанасында дабыл жарияланған еді.
НАТО мамырда да шетелдік дронды атып түсірген
Мамырдың ортасында Литвада орналасқан НАТО жойғышы Эстония аспанында бағытынан жаңылған болуы мүмкін украиналық дронды атып түсірген. Бұл 2022 жылы Ресей Украинаға басып кіргеннен бері Балтық елдерінің бірінің әуе кеңістігінде НАТО күштерінің шетелдік дронды алғаш рет жоюы еді.
Киев Мәскеуді украиналық дрондарды әдейі Балтық елдеріне қарай бағыттайды деп айыптады. Еуроодақ пен НАТО өкілдері де осыған ұқсас баға берген.
Көршілес Латвияда мамыр айының басында болған дрон оқиғасы үкіметтік дағдарысқа ұласып, соның салдарынан премьер-министр Эвика Силиня отставкаға кеткен.
Украинадағы соғыс басталғаннан кейін НАТО өзінің шығыс шебін күшейтіп келеді. Соның аясында Германия Литваға Бундесвер бригадасын орналастырды. Жоспар бойынша, 2027 жылдың соңына қарай оның құрамы 4800 әскери қызметкер мен 200 азаматтық маманға жетуі тиіс.