Нұр-Сұлтан мен Шымкентте полиция митинг өтетін орында ондаған адамды ұстады
21 қыркүйекте түскі 13.40 шамасында Шымкентте полиция Ордабасы алаңына жақын саябақта жүрген бірнеше адамды ұстап әкетті деп хабарлады Шымкенттегі Азаттық тілшісі.
"Не үшін ұстап жатырсыз?" деген сұраққа полиция жауап бермеді. Ұсталғандар арасында кәмелетке толмаған бір бала болған. Оның анасы саябақта елде "Қытай зауыттарының салынуына" қарсылық танытып, пікірін айтқан. Полиция саябақ жанындағы аялдамада отырған адамдарды да отырғызды.
Нұр-Сұлтанда да полиция "митинг белгіленген аумақ" — Есіл сауда үйінің алдында ондаған адамды ұстады. Наразы азаматтар "саяси тұтқындарға бостандық!", "Шал дұшпан!" деп айқайлады.
Тікелей эфирді көріңіз:
<div class=«c-sticky-element» data-sp_api=«youtube»>Сәлден соң оқиға орнына келген Нұр-Сұлтан қалалық әкімдігінің өкілі мұнда бүгін митинг өткізу жайлы ешкімнен өтініш түспегенін, митингінің заңсыз екенін ескертіп, жұртқа тарауын сұрады.
Ал жиналғандардың бірі Азаттыққа "4 қыркүйекте әкімдікке мұнда бейбіт жиын өткізу туралы өтініш бергенін, екі апта өтсе де жауап алмағанын" айтты.
"Бір жыл бұрын өтініш берсең де қарамайтын сияқты" деді ол.
Азаттық тілшісінің хабарлауынша, Есіл сауда үйі орналасқан Республика даңғылының екі жағын полиция жауып тастаған. Тек қоғамдық көліктер ғана жүріп жатыр.
Түскі сағат 14.30 шамасында полицияның Азаттық тілшісі Сәния Тойкенді де ұстағаны белгілі болды. Тілшінің қолында редакция тапсырмасы, "Пресса" деген жазуы бар киім болған. Бірақ соған қарамастан полиция оны ұстап, автобусқа отырғызды. Нұр-Сұлтан қалалық полиция департаменті бастығының орынбасары Бақытжан Малыбаев "егер журналист болса, босатады" деп жауап берді. Сәлден соң полиция Сәния Тойкенді босатты.
(Жаңалық толықтырылады).