NYT: Иран АҚШ-пен келісімге келгісі келмейді және соғысты жалғастыруға дайындалып жатыр
Тегеран билігі АҚШ пен Израильге қарсы жарты жылға созылған соғыстан кейін өзінің әскери әлеуетін бұрынғыдан жақсырақ бағамдай бастаған және қақтығысты жалғастыруға дайындалып жатыр.
Бұл туралы The New York Times АҚШ барлау қызметінің есебіне сілтеме жасап хабарлады.
Иран АҚШ-пен бейбіт келісім жасауға әзір емес және алдағы бірнеше айда соғысты жалғастыруды көздеп отыр. Сонымен қатар Тегеран билігінің Таяу Шығыстағы нысандарға соққы беру мүмкіндігіне деген сенімі артқан. Мұны соңғы бірнеше аптада АҚШ барлау қызметі жинаған деректер көрсетеді.
«Көп жағдайда бұл баға салыстырмалы тыныштық кезеңінен кейін ұрыс қимылдары қайта басталған соң қалыптасқан жағдайды көрсетеді. Соңғы апталарда Иран Ормуз бұғазындағы кемелерге және аймақтағы америкалық әскерлерге шабуыл жасады. Ал АҚШ Қарулы күштері Иран аумағына соққы беріп, оның салдарынан әскери қызметкерлер мен бейбіт тұрғындар қаза тапты», – деп жазады басылым.
«Иран қақтығысты айтарлықтай ушықтыруды қарастыруы мүмкін»
NYT-ке барлау есебімен таныс дереккөздердің айтуынша, қатаң бағыт ұстанатын Иран билігі қақтығысты едәуір ушықтыру мүмкіндігін қарастырып жатқан болуы ықтимал.
Дереккөздердің пікірінше, бірде бәсеңдеп, бірде қайта өршіген соғыс басталғанына жарты жыл өткен соң Иран өзінің әскери қуатын бұрынғыға қарағанда әлдеқайда жақсы түсіне бастаған. Соның нәтижесінде Тегеранның өз әскери мүмкіндіктеріне деген сенімі де күшейген.
«Иран Трамптың саяси проблемаларына мүдделі»
NYT тілдескен АҚШ-тың қазіргі және бұрынғы шенеуніктерінің бағалауынша, АҚШ пен Израильдің Иранға қарсы соғысын түпкілікті тоқтатуға мүмкіндік беретін келісімге қол жеткізу оңай болмайды.
«Иранның АҚШ-пен қандай да бір келісім жасауға дайын екенін көрсететін белгі аз. Оның үстіне Тегеран АҚШ-тағы аралық сайлау қарсаңында президент Дональд Трамптың саяси проблемаларының ушығуын өзіне тиімді санап отыр», – деп келтіреді басылым дереккөздерінің пікірін.
Трамп әкімшілігі экономикалық санкциялар Тегеранды Ормуз бұғазын бақылау және Иранның ядролық бағдарламасы мәселесінде ымыраға келуге мәжбүр етеді деп үміттенеді.
Алайда барлау есебімен таныс америкалық шенеуніктердің пікірінше, қысқа мерзімде санкциялар Иранды келіссөзге итермелеудің орнына, керісінше, қақтығыстың одан әрі ушығуына алып келуі мүмкін.