Оралда 50 күн әкімшілік қамауда болған белсенді бостандыққа шыға сала қайта ұсталды
Оралда азаматтық белсенді Маруа Ескендірова 50 күн әкімшілік қамауда болғаннан кейін бостандыққа шығып, қайтадан полицияға жеткізілді. Бұл оның соңғы екі айдағы наразылық акцияларына байланысты кезекті рет ұсталуы.
Қазақстандық адам құқықтары жөніндегі халықаралық бюроның (КМБПЧ) Батыс Қазақстан облыстық филиалының мәліметінше, Ескендирова 4 қыркүйекте арнайы қабылдау орнынан шыққаннан кейін Оралдағы Абай алаңына барған.
Ол «Әлеуметтік мәселелердің шешілуін және жеке тұрғын үй құрылысына 10 сотық жер бөлуді талап етемін» деген жазуы бар жейде киіп шыққан. Көп ұзамай белсендіні полиция қызметкерлері ұстап әкеткен.
Екі рет 25 тәуліктен қамауда болған
Ескендірова бұған дейін де осы алаңда наразылық білдіруге әрекет жасаған.
16 шілдеде ол Абай алаңына шығып, аштық жариялаған. Белсенді әлеуметтік мәселелерді шешуді, баға өсімін тежеуді, зейнетақы мен жәрдемақыны көбейтуді және тұрғын үй салуға жер телімдерін беруді талап еткен. Кейін сот оны бейбіт жиын өткізу тәртібін бұзды деп танып, 25 тәулікке әкімшілік қамауға алды.
10 тамызда 25 тәуліктік жазасын өтеп шыққан Ескендірова қайтадан Абай алаңына барған. Бұл жолы да оның үстінде әлеуметтік мәселелерді шешу және жеке тұрғын үй құрылысына 10 сотық жер бөлу туралы талап жазылған жейде болған. Ол қайта ұсталып, сот тағы 25 тәулік әкімшілік қамау жазасын тағайындаған.
Осылайша, белсенді екі әкімшілік жаза бойынша жалпы 50 тәулік арнайы қабылдау орнында отырды.
4 қыркүйекте екінші қамау мерзімі аяқталып, бостандыққа шыққан Ескендірова тағы да Абай алаңына барған. Алайда КМБПЧ мәліметінше, ол өз талабын жария түрде айтып үлгерместен қайта ұсталған.
Құқық қорғаушылар әкімшілік қамаудың бірнеше рет қатарынан қолданылуы азаматтың бейбіт түрде пікір білдіру құқығын шектеу құралына айналып кетпей ме деген мәселе көтеріп отыр.
Әзірге Ескендіроваға соңғы ұсталуына байланысты қандай әкімшілік жаза тағайындалғаны туралы ақпарат жарияланған жоқ.