Парсы шығанағындағы бомбалауда үзіліс: АҚШ-тың оқ-дәрі қоры азайып барады

 Сонымен қатар бұл операциялар АҚШ армиясының оқ-дәрі қорына елеулі салмақ түсіруі мүмкін екені айтылған.

Иран: АҚШ тоқтаса, біз де тоқтаймыз

26 шілдеде Reuters агенттігіне пікір білдірген Иранның жоғары лауазымды шенеунігі «егер АҚШ дәл осылай әрекет етсе, Иран да шабуылдарын тоқтатады» деп мәлімдеді.

Атын жарияламауды сұраған дереккөздің айтуынша, Тегеранның ұстанымы өзгермеген.

«Біздің қағидамыз – шабуылға шабуылмен жауап беру. Егер шабуылдар тоқтаса, Иран да өз операцияларын тоқтатады. Бұл хабар АҚШ-қа жеткізілді», – деді ол.

Бұл мәлімдеме АҚШ президенті Дональд Трампқа оның кеңесшілері шабуыл жасайтын нысандар азайып бара жатқанын және АҚШ-тың әскери арсеналы қысымға ұшырап жатқанын ескерткен кезде жасалды.

АҚШ шабуылдарды уақытша тоқтатты

АҚШ Иранға қарсы 13 түн қатарынан әуе соққыларын жасағаннан кейін жұма күні кешке бомбалау науқанын тоқтатты. Сенбі мен жексенбі күндері АҚШ тарапынан жаңа шабуыл тіркелген жоқ.

Әдетте әрбір америкалық шабуылға жауап қайтаратын Иран да екі күн бойы қарымта соққы жасамады.

Соған қарамастан, Иран билігі бұл үзіліске сенімсіздікпен қарайды.

«Оптимизмнен гөрі күмән басым. Бұл үзіліс шынайы емес, тактикалық сипатта деп есептейміз. Иран АҚШ-тың түрлі айла-тәсілдерімен бұрыннан таныс», – деді ирандық шенеунік.

АҚШ: дипломатияға мүмкіндік беріліп жатыр

АҚШ-тың БҰҰ жанындағы елшісі Майк Уолтц президент Дональд Трамптың дипломатиялық келіссөздерге мүмкіндік беру үшін шабуылдарды уақытша тоқтатуға шешім қабылдағанын айтты.

«Президент келіссөздерге аз да болса мүмкіндік беріп отыр», – деді ол.

NBC телеарнасына берген сұхбатында Уолтц АҚШ армиясында қажетті әскери құралдардың жеткілікті екенін айтқанымен, қорғаныс министрі Пит Хегсет қызметіне кіріскен кезде оқ-дәрі қоры әлсіреген жағдайды қабылдап алғанын мәлімдеді.

Генералдар Трампқа ескерту жасаған

Трамптың шабуылдарды тоқтату туралы шешімі 24 шілдеде жоғары лауазымды әскери және саяси кеңесшілер қатысқан арнайы кеңестен кейін қабылданған.

Axios басылымының мәліметінше, жиында АҚШ вице-президенті Джей Ди Вэнс бұл мәселе бойынша күмәнін білдірген.

Ал АҚШ-тың Таяу Шығыстағы күштерінің қолбасшысы, адмирал Брэд Купер бомбалау науқанын тоқтатуды ұсынған.

«Өйткені операция өзінің тиімділік шегіне жетті», – деген ол.

АҚШ-тың аты-жөнін атамаған шенеунігінің айтуынша, әскери басшылық соңғы күндері Ормуз бұғазындағы операция үшін алдын ала белгіленген нысандардың басым бөлігі жойылғанын жеткізген.

Ауқымды әскери операцияларды қайта бастау мүмкіндігі әлі де қарастырылып отыр. Алайда АҚШ Қарулы күштері штаб бастықтарының біріккен комитетінің төрағасы генерал Дэн Кейн Трампқа мұндай қадам оқ-дәрі қорының, әсіресе Таяу Шығыстағы әуе қорғаныс жүйелеріне арналған тосқауыл зымырандарының азаюына әкелуі мүмкін екенін ескерткен.

АҚШ Орталық қолбасшылығы (CENTCOM) әзірге бұл ақпаратқа түсініктеме берген жоқ. Reuters агенттігінің жазуынша, америкалық әскери басшылық президентке берілген жабық кеңестердің мазмұнын жарияламайды.

«Аяқталмай тұрған соғыс»

Соңғы екі аптада АҚШ әскері Ормуз бұғазындағы кемелерге жасалған шабуылдарға жауап ретінде Ирандағы әскери нысандарды күн сайын атқылап келді.

Өз кезегінде Иран АҚШ-тың шабуылдарына жауап ретінде Парсы шығанағындағы араб мемлекеттерінде орналасқан америкалық әскери базаларды нысанаға алды.

Тегеран әлемдік мұнай тасымалының шамамен 20 пайызы өтетін Ормуз бұғазына бақылауын сақтап қалатынын бірнеше рет мәлімдеді.

Ал АҚШ-тың қайта басталған әскери науқаны өткен айда қол жеткізілген уақытша бітімнің іс жүзінде күшін жойып, тараптарды қайтадан қарулы қақтығыс жағдайына алып келді.