Саясат

Прокуратура полицияның әрекетін заңсыз деп таныған: журналист Лұқпан Ахмедьяров сотқа жүгінді

Прокуратура полицияның әрекетін заңсыз деп таныған: журналист Лұқпан Ахмедьяров сотқа жүгінді

Фото: ашық дереккөз

Журналист Лұқпан Ахмедьяровтың Астана қалалық полиция департаментіне қарсы талап арызы сотта қарала бастады. Журналист елден шығуына заңсыз тыйым салынуы салдарынан келген материалдық шығынды өндіріп алуды талап етіп отыр.

19 қарашада өткен сот отырысында судья тараптарға дауды медиация арқылы реттеуді ұсынған. Алайда полиция департаментінің өкілі бұл ұсыныстан бас тартқан. Бұл туралы журналистке адвокат Әсел Тоқаевамен бірге құқықтық көмек көрсетіп жүрген "Құқықтық медиа орталық" қоғамдық қоры хабарлады.

Даудың туындауына биыл тамыз айында болған оқиға себеп болған. Лұқпан Ахмедьяров отбасымен бірге шетелге демалысқа ұшпақ болғанда, әуежайдағы шекара қызметкерлері оның Қазақстаннан шығуына рұқсат бермеген. Шекарашылар журналистке қатысты полиция тарапынан шектеу қойылғанын айтқан.

Кейін журналист бұл шешімнің заңдылығына шағымданған. Нәтижесінде Астана қаласының прокуратурасы оның елден шығуына қойылған тыйымды заңсыз деп таныған.

Осыдан кейін Ахмедьяров полиция департаментін сотқа беріп, заңсыз шектеудің салдарынан шеккен материалдық шығынын өтеуді талап еткен.

Келесі алдын ала сот отырысы 1 желтоқсанға белгіленді.

Журналистке қатысты қылмыстық істер

Еске салайық, 2026 жылғы 12 тамызда Астана полициясының Лұқпан Ахмедьяровқа қатысты Қылмыстық кодекстің 274-бабы – "Көрінеу жалған ақпарат тарату" бойынша сотқа дейінгі тергеу бастағаны белгілі болды.

Бұған дейін журналист өзіне қатысты екі қылмыстық іс қозғалғанын мәлімдеген. Оның айтуынша, екі іс бойынша да қорғануға құқығы бар куәгер мәртебесінде болған.

Сондай-ақ биыл жазда журналистің басынан бірнеше келеңсіз оқиға өтті. "Әділ сөз" қорының мәліметінше, ол Facebook және WhatsApp аккаунттарына бір мезгілде кіре алмай қалған. Кейін белгісіз біреу Астанада оның автокөлігіне бояу шашып, бүлдірген.

Ахмедьяров бұл оқиғаға қатысты полицияға арыз түсірген.

Қазіргі уақытта журналистің полицияға қарсы азаматтық талап арызы бойынша түпкілікті сот шешімі шыққан жоқ. Полиция департаментінің талап арызға қатысты толық құқықтық ұстанымы да жарияланған жоқ.

Сайт Әкімшілігі