Қазақстаннан 45 млрд теңгенің мұнай өнімдері заңсыз шығарылған
Тергеу мәліметінше, Маңғыстау облысының кәсіпкері мұнай сатып алып, оны шағын зауыттарда өңдеген. Кейін жалған құжаттар рәсімдеген.
Осыдан соң мұнай өнімдерін пеш отыны ретінде көрсетіп, Ақтау порты арқылы танкермен шетелге жөнелтіп отырған.
2019-2023 жылдар аралығында осы тәсілмен 160 мың тоннадан астам өнім заңсыз шығарылуы мүмкін. Жасалған операциялардың жалпы сомасы шамамен 45 млрд теңгені құраған.
Топтың бес мүшесі 8 жылға бас бостандығынан айрылды. Олардың мүлкі тәркіленіп, мемлекет кірісіне 2 млрд теңгеден астам қаражат өндірілді.
Схеманы ұйымдастырды деген күдікті халықаралық іздеуде жүр.