Ресей әскері Украинада автобусқа дронмен соққы жасады: бес адам қаза тапты
Ресей әскері Украинаның Днепропетровск облысындағы Никополь ауданында жолаушылар автобусына дронмен соққы жасады. Салдарынан бес адам қаза тауып, кемінде жеті адам жараланды.
Бұл туралы 16 қыркүйекте Днепропетровск облыстық әскери әкімшілігінің басшысы Александр Ганжа хабарлады.
Киев-Николаев жолаушылар пойызына да шабуыл жасалды
Бұдан бөлек, Ресей әскері №122 Киев – Николаев жолаушылар пойызына соққы жасағанын «Укрзалізниця» теміржол компаниясы мәлімдеді.
Мониторинг тобының алдын ала ескертуінің арқасында локомотив және пойыз бригадалары мен барлық жолаушы дер кезінде эвакуацияланған. Зардап шеккендер жоқ. Жолаушыларды әрі қарай жеткізу үшін автобустар ұйымдастырылған.
16 қыркүйекке қараған түні Ресей әскері Киевке де реактивті дрондармен шабуыл жасады. Киев мэрі Виталий Кличконың мәліметінше, Святошин ауданындағы қойма ғимаратында өрт шығып, бір адам жараланған. Ол ауруханаға жеткізілді.
Украинаның Төтенше жағдайлар жөніндегі мемлекеттік қызметі Херсонда ресейлік FPV-дрон жеңіл автокөлікке соққы жасағанын хабарлады. Көлік өртеніп, кейін өрт сөндірілген. Зардап шеккендер жоқ.
Украинаға 80 дрон жіберілген
Украина Қарулы күштері Әуе күштерінің мәліметінше, түн ішінде Ресей Украина аумағына 80 соққы дронын ұшырған.
Украинаның әуе қорғанысы олардың 63-ін атып түсірген немесе радиоэлектрондық құралдармен залалсыздандырған. Жеті жерде дрондардың нысанаға тигені, тағы екі жерде атып түсірілген дрондардың сынықтары құлағаны тіркелген.