Ресейдің дрондарының әрбір екіншісі нысанаға дәл тиіп жатыр – Зеленский
Украина президенті Владимир Зеленский Ресей ұшырып жатқан дрондардың едәуір бөлігі белгіленген нысаналарына жететінін мәлімдеді.
Оның айтуынша, қыркүйек айында Ресей әскері Украина аумағына бағыттаған реактивті дрондардың шамамен әрбір екіншісін украиналық әуе шабуылына қарсы қорғаныс жүйелері атып түсіре алмаған.
Зеленскийдің сөзінше, 27 қыркүйекке қараған түні Ресейдің соққыларынан адам қаза тапқан. Запорожье облысында үш адам көз жұмса, Киевте дронның соққысынан бір ер адам қаза болды.
Президент осы аптада Ресей Украинаға 2200-ден астам шабуылдаушы дрон, шамамен 1650 әуе бомбасын және 38 түрлі зымыран, оның ішінде баллистикалық зымырандарды ұшырғанын айтты.
Украинаның санкциялық саясат жөніндегі уәкілі Владислав Власюк елдің жылдам ұшатын нысандарды ұстайтын дрон-тосқауылдаушыларды қажетті көлемде өндіре алмайтынын және әуе шабуылына қарсы зымырандар бойынша Батыс елдерінің жеткізіліміне толық тәуелді екенін мойындады.
Украинадағы соққылар
Одесса облысында 27 қыркүйекке қараған түні болған соққылардан кәсіпорындар, қоймалар және көлік нысандары зақымданған.
Ресей Қорғаныс министрлігі Ильичанкадағы "Дрон Калинш" логистикалық орталығына, Килия портындағы нысанға және құрғақ жүк кемесіне шабуыл жасалғанын хабарлады.
Киевте соққы "Vodafone" деректерді өңдеу орталығына тиген. Ал облыста Красиловкадағы "Zammler Group" логистикалық орталығы нысанаға алынған. Украиналық тарап та Zammler Group қоймалары зақымданғанын хабарлады.
Елордада түнде Соломенский ауданындағы көлік жөндеу станциясында өрт шыққан. Мемлекеттік төтенше жағдайлар қызметінің мәліметінше, осы ауданның тұрғын емес ғимараты да зақымданған. Киев мэрі Виталий Кличко нысанда қоймалар болғанын айтты.