РФ Украинаға «тыныштық режиміне» қарамастан соққы жасады
Украина президенті Владимир Зеленский ұсынған біржақты «тыныштық режимі» 6 мамырға қараған түні күшіне енгенімен, Ресей әскері Украина аумақтарына шабуылын жалғастырды.
Бұл туралы Deutsche Welle хабарлады.
Зеленский бұған дейін Ресей жариялаған 8-9 мамырға арналған «жеңіс күніндегі бітімге» балама ретінде 6 мамырдан бастап атысты тоқтатуды ұсынған еді. Алайда, Украина билігінің мәліметінше, Ресей әскері шабуылды тоқтатпаған.
Запорожье облыстық әскери әкімшілігінің басшысы Иван Федоровтың айтуынша, 6 мамырға қараған түні өңірдегі өнеркәсіп нысандарының бірі шабуылға ұшыраған. Украина Әуе күштерінің дерегінше, Ресей Запорожье бағытына басқарылатын авиациялық бомбалар жіберген. Сонымен қатар Харьков, Сумы және Донецк облыстарында да әуе шабуылдары тіркелген. Харьков пен Днепропетровск облыстарында ресейлік дрондар байқалған.
Әзірге Украина билігі жаңа шабуылдарға ресми жауап бермеді. Бұған дейін Зеленский Ресей атысты тоқтатпаса, Украина жауап қайтаратынын мәлімдеген.
«Тыныштық режимі» қалай пайда болды?
Апта басында Ресей президенті Путин 8–9 мамыр күндері «Жеңіс күнін мерекелеуге байланысты» біржақты бітім жариялағанын хабарлаған. Ресей Қорғаныс министрлігі Украина мерекеге кедергі келтірсе, Киевке «жаппай зымыран соққысы жасалатынын» ескерткен.
Бұған жауап ретінде Зеленский Украина 6 мамыр түнінен бастап атысты тоқтатуға дайын екенін, бірақ Ресей де дәл солай әрекет етуі керек екенін айтқан. Зеленский «адам өмірі кез келген мерекеден әлдеқайда қымбат» екенін мәлімдеді.
5 мамырда Украина президенті кеңсесінің басшысы Кирилл Буданов та Киевтің атысты тоқтатуға дайын екенін растаған. Оның сөзінше, Ресей де соққыларын тоқтатса, Украина «тыныштық режимін» әрі қарай сақтауға әзір.
Ресей президентінің көмекшісі Юрий Ушаковтың айтуынша, 9 мамыр қарсаңындағы уақытша бітім идеясын алғаш рет Путин АҚШ президенті Трамппен әңгімесінде көтерген.
Бітім алдында да шабуылдар тоқтамады
5 мамыр күні Ресей әскері Украина аумақтарына шабуыл жасаған. Днепр, Запорожье және Краматорск қалаларында 20-дан астам адам қаза тапқан.
Сонымен бірге Ресей аннексиялап алған Қырымның басшысы Сергей Аксенов Джанкой қаласына жасалған украиналық дрон шабуылы салдарынан бес бейбіт тұрғын қаза тапқанын мәлімдеді. Украина тарапы бұл ақпаратқа қатысты әзірге пікір білдірген жоқ.