Рязаньға дрондар жаппай шабуыл жасады: мұнай өңдеу зауыты мен Wildberries қоймасында өрт шықты

5 қарашаға қараған түні Ресейдің Рязань облысына украиналық дрон жаппай шабуыл жасады. Салдарынан қаладағы өнеркәсіп нысандарында өрт шығып, бір адам жарақат алды. Шабуыл нысандарының қатарында Рязань мұнай өңдеу зауыты мен Wildberries компаниясының логистикалық орталығы бар екені хабарланды.

Бұл туралы Deutsche Welle басылымы жазды.

Рязань облысының губернаторы Павел Малковтың мәліметінше, дрондардың сынықтары өнеркәсіп кәсіпорындарының аумағына құлап, өрт шыққан. Сонымен қатар электр желілерінің зақымдануынан қаланың кейбір аудандарында жарық сөніп қалған. Бір адам жарақат алған.

Украиналық Exilenova+ және Supernova+ мониторингтік Telegram арналары шабуыл нысандарының бірі Рязань мұнай өңдеу зауыты болғанын хабарлады. Аталған кәсіпорын Ресей армиясын авиациялық отынмен және дизельмен қамтамасыз етеді деген мәлімет бар.

Куәгерлер жариялаған фото және бейнежазбалардан зауыт аумағында ірі өрт шыққанын көруге болады.

Ресейдегі ең ірі мұнай өңдеу зауыттарының бірі

Рязань мұнай өңдеу зауыты "Роснефть" компаниясына тиесілі және Ресейдегі ең ірі үш мұнай өңдеу кәсіпорнының бірі саналады.

Зауыттың өндірістік қуаты жылына 17 миллион тоннадан астам мұнай өңдеуге мүмкіндік береді. Мұнда автомобиль бензині, дизель отыны, авиациялық керосин, мазут және битум өндіріледі.

Кәсіпорын өнімдерінің негізгі бөлігі Мәскеу мен Ресейдің орталық аймақтарына жеткізіледі.

Рязань мұнай өңдеу зауыты бұған дейін де бірнеше рет украиналық дрондардың шабуылына ұшыраған. Атап айтқанда, 15 қазандағы шабуылдан кейін кәсіпорындағы мұнайды бастапқы өңдеу қондырғыларының бірінің жұмысы тоқтатылған.

Wildberries қоймасына да соққы жасалды

Astra басылымының хабарлауынша, Рязаньдағы Wildberries компаниясының логистикалық кешені де шабуылға ұшыраған.

Аумағы шамамен 173 мың шаршы метр болатын тарату орталығына дрон түскеннен кейін өрт шыққанын жергілікті тұрғындар мәлімдеді.

Бұл қоймаға бұған дейін 29 тамызда да шабуыл жасалған. Сол кезде логистикалық орталықтың жұмысы уақытша тоқтатылған болатын.

Ростов пен Воронеж облыстарына да шабуыл жасалды

5 қарашаға қараған түні Ресейдің Ростов облысына да дрон шабуыл жасады.

Облыс губернаторы Юрий Слюсарьдың айтуынша, өңірдің төрт ауданында 50-ге жуық дрон ұсталған. Зардап шеккендер мен қираған нысандар туралы мәліметтер әзірге нақтыланып жатыр.

Воронеж облысының губернаторы Александр Гусев те өңір аумағында 48 дрон анықталып, жойылғанын хабарлады.

Оның сөзінше, алдын ала мәлімет бойынша зардап шеккендер жоқ. Алайда дрон сынықтарының құлауынан қала маңындағы жеке тұрғын үйдің қоршауы мен жүк көлігінің жартылай тіркемесі зақымданған.

Ал Ресей Қорғаныс министрлігі 5 қараша күні таңертең елдің 14 өңірі, аннексияланған Қырым, сондай-ақ Азов және Қара теңіздер акваториялары үстінде ұшақ үлгісіндегі 496 дрон жойылғанын мәлімдеді.

Ресей билігі келтірген бұл мәліметтерді тәуелсіз дереккөздер арқылы толық растау әзірге мүмкін емес.