Шахматшы Бибісара Асаубаева министрлікті қатаң сынады
Туризм және спорт министрлігі шахматшының Президентке жолдаған үндеуінен кейін арнайы брифинг өткізіп, оған бөлінген қаржы көлемі туралы мәлімет жариялаған еді.
Енді бүгін шахматшы министрліктің жауабын сынға алды.
«ИНТЕЛЛЕКТ ПРИОРИТЕТ ЕМЕС ПЕ?
Мен Туризм және спорт министрлігінің ресми жауабын мұқият оқыдым. Онда: «Шахмат – басым спорт түрлерінің қатарына кірмейді» делінген. Шынымды айтсам, бұл сөйлемді бірнеше рет қайталап оқуға тура келді.
Жуырда ғана Президент Қасым-Жомарт Тоқаев елдің стратегиялық бағытын нақты атап өткен еді: «Күшті ұлт – мықты интеллекттен басталады. XXI ғасырда негізгі ресурс – шикізат емес, білім мен ғылым».
Әлемнің жетекші елдерінде шахмат – жай ғана спорт емес. Ол стратегиялық ойлау, интеллектуалдық капитал және мемлекеттің бәсекеге қабілеттілігінің символы. Егер шахмат басым бағытқа жатпаса, онда қарапайым сұрақ туады: Президенттің мені ІІ және ІІІ дәрежелі «Барыс» орденімен марапаттауы қандай еңбектің нәтижесі?
Бүгінде мен әлемдік рейтингте 5-орында тұрмын.
Министрліктің жауабынан шығатын қорытынды қарапайым: шенеуніктер емес, менің ата-анам - елімнің интеллектуалдық болашағына инвестиция жасаған нағыз патриоттар.
Қазақстанның болашағы – интеллектке, білімге, ғылымға және адами капитал сапасына байланысты.
Негізгі сұрақ: Туризм және спорт министрлігінің ұстанымы Президенттің стратегиялық бағытына сәйкес келе ме? Өйткені шахматқа деген көзқарас – интеллектке деген көзқарас. Ал интеллектке деген көзқарас – ел болашағына деген көзқарас.
Бәлкім, министрліктің бағыты басқа шығар…», - деп жазды шахматшы.