Сот Трамп әкімшілігін CNN, MS NOW және Politico журналистерін Ақ үйге қайта кіргізуге міндеттеді
АҚШ-тың федералдық судьясы Дональд Трамп әкімшілігін CNN, MS NOW және Politico журналистерінің Ақ үйге кіру рұқсатын қалпына келтіруге міндеттеді.
Судья үш БАҚ өкіліне салынған шектеу АҚШ Конституциясына қайшы болуы мүмкін деп есептейді.
24 қыркүйекте Вашингтондағы федералдық округтік соттың судьясы Тим Келли үш БАҚ-тың Трамп әкімшілігіне қарсы түсірген шағымы бойынша уақытша шешім шығарды.
Судья әкімшілікке CNN, MS NOW және Politico журналистерінің Ақ үйге тұрақты кіру рұқсаттарын дереу қайтаруды тапсырды. Сондай-ақ алдағы 14 күн ішінде оларға Ақ үйге кіруге тыйым салатын шешімді қолдануға шектеу қойды.
Бұған дейін Трамп 18 қыркүйекте аталған үш БАҚ өкілдерінің Ақ үйге кіруіне тыйым салған еді.
Судья ұлттық қауіпсіздік туралы уәжге күмән келтірді
Трамп әкімшілігі журналистердің рұқсатнамасын қайтарып алуды ұлттық қауіпсіздік мәселесімен түсіндірген. Алайда судья Тим Келли бұл уәжді жеткілікті негізделмеген деп санады.
«Іс материалдарында талапкерлердің тұрақты рұқсатнамасын қайтарып алу шынымен ұлттық қауіпсіздікті қамтамасыз ететіні немесе сот олардың рұқсатнамасын уақытша қалпына келтірген жағдайда ұлттық қауіпсіздікке қатер төнетіні туралы жауапкерлердің мәлімдемесін растайтын нақты негіз жоқ», – деді судья.
Келли Трамптың өзі бұған дейін үш БАҚ-қа қатысты шешімін олардың материалдарының «шындыққа жанаспайтыны және негатив сипатта болуымен» түсіндіргеніне назар аударды.
Трамп әлеуметтік желіде CNN, MS NOW және Politico «ойдан шығарылған және жалған ақпаратты тұрақты түрде жазуға немесе таратуға мүмкіндік алмауы тиіс» деп мәлімдеген.
Үш БАҚ Трампты сотқа берді
CNN, MS NOW және Politico 21 қыркүйекте Дональд Трамп пен оның әкімшілігінің бірқатар өкіліне қарсы Вашингтондағы федералдық сотқа талап арыз түсірді.
БАҚ өкілдерінің пікірінше, Ақ үйге кіруге салынған тыйым АҚШ Конституциясының бірінші түзетуінде бекітілген сөз және баспасөз бостандығына, сондай-ақ тиісті құқықтық рәсімге деген құқықтарына қайшы келеді.
Олар негізгі сот талқылауы аяқталғанша журналистердің Ақ үйге кіру мүмкіндігін дереу қалпына келтіретін уақытша сот шешімін шығаруды сұраған.
Ақ үй журналистерге шешімді даулауға мүмкіндік бермеген
23 қыркүйектегі сот отырысында судья Тим Келли бұған дейінгі екі сот прецедентіне назар аударды. Оның айтуынша, журналистердің Ақ үйдегі тұрақты рұқсатнамасы қайтарылып алынбас бұрын оларға тиісті құқықтық рәсім қамтамасыз етілуі тиіс.
Судьяның пікірінше, Ақ үй үш БАҚ-қа өздерінің рұқсатнамасынан айырылуына байланысты шешімді тиімді түрде даулауға мүмкіндік бермеген.
БАҚ адвокаты журналистерге алдын ала тиісті хабарлама берілмегенін және шешімге қарсылық білдіруге мүмкіндік жасалмағанын айтты.
АҚШ Әділет министрлігі: Ақ үйге кіру – құқық емес, артықшылық
Трамп әкімшілігінің ұстанымын қорғаған АҚШ Әділет министрлігінің заңгері Ақ үйге кіру журналистердің ажырамас құқығы емес, берілетін артықшылық екенін мәлімдеді.
Министрлік Ақ үй әкімшілігі 22 қыркүйекте үш БАҚ-қа жолдаған хаттарында рұқсатнаманы қайтарып алу себебін жеткілікті түрде түсіндіргенін алға тартты.
Алайда судья бұл хаттардың журналистердің рұқсатнамасы қайтарылып алынып, БАҚ сотқа жүгінгеннен кейін жіберілгеніне назар аударды.
Reuters, The Washington Post және Fox News үш БАҚ-ты қолдады
Дауда бірқатар ірі америкалық және халықаралық БАҚ үш медианың ұстанымын қолдады.
23 қыркүйекте баспасөз бостандығын қорғайтын ұйымдар мен ондаған БАҚ сотқа бірлескен құқықтық қорытынды ұсынды.
Олар журналистер мен БАҚ-ты редакциялық ұстанымына байланысты құқықтарынан айыру АҚШ Жоғарғы сотының ондаған жыл бойы қалыптасқан тәжірибесіне қайшы екенін мәлімдеді.
Құжатқа Репортерлердің баспасөз бостандығы жөніндегі комитетімен қатар Reuters, The Washington Post және Fox News өкілдері де қол қойған.
Іс бойынша негізгі сот талқылауы жалғасады. Әзірге шығарылған шешім CNN, MS NOW және Politico журналистеріне Ақ үйде қайта жұмыс істеуге уақытша мүмкіндік береді.