Тоқаев ҚМА төрағасын қабылдады
Тоқаев Қаржылық мониторинг агенттігінің (ҚМА) төрағасы Жанат Элимановты қабылдады.
Кездесуде ведомство жұмысының негізгі нәтижелері мен алдағы кезеңге арналған міндеттері туралы есеп тыңдалды. Мемлекет басшысы агенттік қызметінің негізгі бағыттары бойынша бірқатар тапсырма берді.
Жанат Элимановтың баяндамасынан негізгі деректер:
Мал шаруашылығы: Субсидияларды тиімсіз пайдаланудың 30 миллиард теңгелік тәуекелдері анықталды.
Ғылым: Ғылыми зерттеулер мен нәтижелерді коммерцияландыруға бөлінген 10 миллиард теңгеден астам грант қаражатын талан-таражға салу белгілері тіркелді.
Медицина және құрылыс: МӘМС (Міндетті әлеуметтік медициналық сақтандыру) қаражатын жымқыру фактісі бойынша 14 сотқа дейінгі тергеп-тексеру басталды. Құрылыс саласында 5,3 миллиард теңгені жымқыру белгілері бойынша тағы 21 қылмыстық іс тергелуде.
Алаяқтыққа қарсы іс-қимыл:
17 қаржы пирамидасы жойылды.
Банктер мен байланыс операторларының атынан жаппай фишингтік SMS-хабарламалар таратқан топтың қызметі тоқтатылды.
3,7 мың алаяқтық сайт пен аудиториясы 25 мыңнан асатын 22 топтық чат жабылды.
Қылмыстық кірістерді заңдастырумен күрес:
Дроп-карталар: Жалған тұлғаларға ашылған карталарды пайдалану бойынша 14 сотқа дейінгі тергеу басталды. Олардың жалпы айналымы 13 миллиард теңгеден асқан. 68 мыңнан астам осындай карта бұғатталды.
Жалған компаниялар: Фиктивті компаниялар мен құжаттарды пайдалану арқылы келтірілген шығын көлемі 13 миллиард теңгеге жуықтап, 23 тергеу амалдары жүргізілуде.
Криптовалюта: Қаржы пирамидалары мен онлайн-казинолардан түскен табысты заңдастырумен айналысқан 3 көлеңкелі криптоалмастырғыштың жұмысы тоқтатылды. Заңсыз крипто-қызметтерге апаратын 483 сілтемеге шектеу қойылды.