Тоқаев: Президент ретінде елімдегі бейбітшілік пен тұрақтылықты қамтамасыз ету үшін қолдан келгеннің бәрін жасаймын
Саясаттанушы Жанна Тулиндинова президент Қасым-Жомарт Тоқаевтың Берлинде Германия канцлері Фридрих Мерцпен өткізген баспасөз мәслихатындағы мәлімдемелерін талдады.
Ол Қазақстанның Ресей мен Украина арасындағы соғысқа қатысты ұстанымына назар аударды.
Тулиндинованың пікірінше, президенттің Германияға сапарының маңызды бөлігі экономикалық келіссөздер болғанымен, халықаралық қоғамдастықтың назарын Тоқаевтың Ресей-Украина қақтығысына қатысты айтқан сөздері көбірек аударған.
Берлиндегі бірлескен баспасөз мәслихатында ARD журналисі Тоқаевтан бұған дейін айтқан соғыс қимылдарын тоқтатып, келіссөзге көшу жөніндегі ұсынысы туралы сұрады. Қазақстан президенті соғысты бірден аяқтау өте күрделі екенін айта келе, тараптардың келіссөз үстеліне отыруы қажет деген ұстанымын қайталады.
Сонымен бірге Тоқаев Ресей президенті Владимир Путинмен жақсы қарым-қатынаста екенін айтып, оны ірі әрі күрделі тарихы бар мемлекетті басқаруға қажетті қасиеттерге ие саяси тұлға ретінде сипаттады. Бұған қоса Қазақстан БҰҰ Жарғысын және мемлекеттердің аумақтық тұтастығы қағидатын берік ұстанатынын атап өтті.
Жанна Тулиндинова осы мәлімдемелерді Қазақстанның сыртқы саясаттағы прагматикалық бағытымен байланыстырады. Оның пайымдауынша, Астана бір жағынан Ресеймен тікелей әрі сенімді диалогты сақтауға, екінші жағынан Украинаға құрметпен қарап, соғысты тоқтатудың келіссөз жолдарын іздеуге тырысып отыр.
Саясаттанушы Тоқаевтың позициясын realpolitik, яғни қалыптасқан саяси жағдай мен тараптардың нақты мүмкіндіктерін ескеруге негізделген дипломатиялық тәсіл ретінде бағалайды. Оның пікірінше, келіссөзге қол жеткізу үшін шешім қабылдауға ықпалы бар тараптармен диалог арнасын сақтау маңызды.
Бұл мәселеге Германия канцлері Фридрих Мерц те тоқталды. Ол Тоқаевқа Владимир Путинмен соғысты аяқтау мүмкіндіктерін талқылап жүргені үшін алғыс айтты. Сонымен бірге Мерц Германияның ұстанымын білдіріп, Ресейдің қазіргі уақытта байыпты келіссөзге дайын екенін көріп отырмағанын және Берлин Украинаға қолдау көрсетуді жалғастыратынын мәлімдеді.
Тулиндинова Қазақстанның мұндай дипломатиялық белсенділігінің артында ең алдымен елдің өз мүддесі тұрғанын атап өтеді. Ресей мен Украина арасындағы соғыстың аяқталуы Қазақстан үшін шекара қауіпсіздігіне, саудаға, көлік дәліздерінің тұрақты жұмысына және инвестициялық ахуалға тікелей әсер етеді.
Сондықтан саясаттанушының пайымдауынша, Астананың бейбіт келіссөздерге жәрдемдесуге ұмтылысын халықаралық бедел жинауға бағытталған әрекеттен гөрі Қазақстанның қауіпсіздігі мен экономикалық дамуына негізделген прагматикалық саясат ретінде қарастырған жөн.
Тоқаевтың өзі Берлиндегі сапары барысында Қазақстан үшін бейбітшілік пен тұрақтылықтың негізгі басымдық екенін атап өтті.
"Мен Президент ретінде елімдегі бейбітшілік пен тұрақтылықты қамтамасыз ету үшін қолдан келгеннің бәрін жасаймын", – деді Мемлекет басшысы.