Тоқаев «Самұрық-Қазына» мен ҚТЖ басшыларының ұсталуына қатысты мәлімдеме жасайды

Бүгін, 13 қарашада, Қазақстан президенті Қасым-Жомарт Тоқаевтың төрағалығымен Қауіпсіздік Кеңесінің шұғыл отырысы өтеді. Жиында мемлекет басшысы «Самұрық-Қазына» қоры мен «Қазақстан темір жолы» ұлттық компаниясы басшыларының жемқорлық күдігімен ұсталуына қатысты өз ұстанымын білдіреді.

Бұл туралы президенттің кеңесшісі – баспасөз хатшысы Айбек Смадияров хабарлады.

Оның айтуынша, Қауіпсіздік Кеңесінің отырысы көлік-логистика саласын дамыту мәселелеріне арналады. Алайда жиында елдегі екі ірі ұлттық компания басшысының ұсталуына да ерекше назар аударылады.

«Отырыс барысында президент «Самұрық-Қазына» АҚ және «Қазақстан темір жолы» ҰК АҚ басшыларының сыбайлас жемқорлық қылмысын жасады деген күдікпен ұсталуына байланысты мемлекеттің принципті ұстанымын білдіреді», – деп хабарлады Айбек Смадияров.

Еске салайық, 12 қарашада Ұлттық қауіпсіздік комитеті «Самұрық-Қазына» қорының басқарма төрағасы Нұрлан Жақыпов пен «Қазақстан темір жолы» ұлттық компаниясының басқарма төрағасы Елжас Отыншиевтің ұсталғанын ресми растады.

ҰҚК мәліметінше, олар 11 қарашада сыбайлас жемқорлық қылмысын жасады деген күдікпен ұсталған. Іс бойынша өзге де адамдар тергеліп жатыр.

Қазіргі уақытта тергеу амалдары жүргізілуде. Ведомство күдіктілерге қатысты нақты айыптау эпизодтарын, істегі ақша сомасын және өзге де мән-жайларды жариялаған жоқ.

Ал «Самұрық-Қазына» қоры басшысының ұсталуына қарамастан, компаниялар тобы қалыпты жұмысын жалғастыратынын мәлімдеді.

Әзірге Қауіпсіздік Кеңесінің отырысында қандай нақты шешімдер қабылданатыны белгісіз.