Трамп Иранға қарсы ауқымды әскери операция бастауды қарастырып жатыр – NYT
Трамп Иранға қарсы ауқымды әскери операция бастауды қарастырып жатыр
АҚШ президенті Дональд Трамп Иранға қарсы жаңа ауқымды әуе шабуылдарын ұйымдастыру мүмкіндігін қарастырып жатыр. Израиль Вашингтонға бірнеше күнге созылатын әскери операция жүргізуді ұсынған. Бұл туралы The New York Times басылымы жазды.
Басылым мәліметінше, Израиль билігі Иранның әскери әлеуетін қайта қалпына келтіріп жатқанына алаңдаушылық білдірген. Атап айтқанда, Тегеран зымырандар мен дрон қорын толықтырып жатыр деген ақпарат бар.
Осыған байланысты Израиль АҚШ-қа Иран аумағындағы нысандарға төрт-жеті күнге созылатын әуе шабуылдарын ұйымдастыруды ұсынған.
Израиль тарапы Иранның химиялық және биологиялық қару жасау мүмкіндігін кеңейтіп жатқаны жөнінде де қауіп бар екенін мәлімдеген. Алайда бұл ақпараттың қаншалықты дәл екені әзірге тәуелсіз дереккөздер арқылы расталған жоқ.
The New York Times дерегінше, АҚШ Қорғаныс министрлігі президентке Иранның әскери нысандары мен энергетикалық инфрақұрылымына соққы берудің бірнеше жоспарын ұсынған.
Дегенмен Трамп әзірге әскери операцияны бастау туралы түпкілікті шешім қабылдамаған.
Вашингтонда бұл мәселеге қатысты пікір қайшылығы бар. АҚШ әкімшілігіндегі бірқатар шенеунік Иранның әскери бағдарламалары туралы барлау мәліметтерінің сенімділігіне күмән келтірсе, басқалары жаңа шабуылдардың Таяу Шығыстағы жағдайды одан әрі ушықтыруы мүмкін екенін ескерткен.
Бұған дейін Reuters агенттігі Трамптың Иран тарапынан жаңа арандату әрекеттері болмаса, әскери соққыларды кейінге қалдыру мүмкіндігін қарастырғанын хабарлаған.
Осылайша, Вашингтон мен Тель-Авив Иранға қарсы ықтимал әскери операцияны талқылап жатқанымен, оны жүзеге асыру туралы ресми шешім қабылданған жоқ.