Тула облысында дрон шабуылынан кейін Wildberries қоймасы өртенді
Украинаның дрон шабуылынан кейін Ресейдің Тула облысындағы Wildberries логистикалық орталығында өрт шықты. Алдын ала мәлімет бойынша, бір адам жарақат алған.
Облыс губернаторы Дмитрий Миляевтің айтуынша, дрон сұрыптау орталығының аумағына құлаған. Қазір оқиға орнында жедел қызметтер жұмыс істеп жатыр, зардап шеккен адамға медициналық көмек көрсетілуде. Wildberries компаниясы да логистикалық нысанда өрт шыққанын растады.
Astra басылымы мен Exilenova+ Telegram арнасының мәліметінше, шабуыл Тула облысының Алексин қаласындағы Wildberries қоймасына жасалған. Оның жалпы аумағы шамамен 194,5 мың шаршы метрді құрайды.
Әзірге өрттің нақты көлемі мен келтірілген шығын белгісіз. Алайда әлеуметтік желілерде тараған фото мен видеолардан логистикалық кешеннің едәуір бөлігін жалын шарпығаны байқалады.
Шілде айынан бері 20-дан астам қоймаға шабуыл жасалды
2026 жылдың шілде айының ортасынан бері Украина Wildberries логистикалық орталықтарына тұрақты түрде дронмен соққы жасап келеді. 5 тамыздағы жағдай бойынша компанияның 20-дан астам қоймасы шабуылға ұшыраған.
Бұған дейін Ленинград облысындағы Красный Бор кенті мен Мәскеу облысының Чехов қаласындағы қойма аймақтарында да дрон шабуылынан кейін өрт шыққан.
Сарапшылардың бағалауынша, соңғы бір айдағы шабуылдар салдарынан маркетплейс сатушыларының шығыны 215–280 млрд рубльге жетуі мүмкін.
Шілде айының басында Wildberries сатушылармен жасалатын келісімшартқа өзгеріс енгізіп, енді қару-жарақ, әскери техника, дрон аппараттары, оқ-дәрілер, атыс пен жарылыстар салдарынан туындаған шығындар үшін жауапкершілікті өз мойнына алмайтынын мәлімдеді.
Украина президенті Владимир Зеленский бұл қоймаларға жасалған соққыларды олардың Ресейдің дрондар мен навигациялық жабдық өндірісіне қажетті санкцияланған бөлшектерді жеткізу үшін пайдаланылғанымен түсіндірген.