Түрікменстанда балаларды мемлекеттік телеарна түсірілімі үшін суықта пайдаланады

 Радио Азатлык мәліметінше, бұл жолы елдің батысында оқушылар мен балабақша тәрбиеленушілерін таңертең ерте ипподромға апарып, бірнеше сағат бойы суықта тұрғызған.

Ақпаратқа сәйкес, 19 сәуір күні Балканабад қаласында таңғы сағат 5-те мектептердің әр сыныбынан бес оқушыдан іріктеліп, оларға мектепке дейінгі балалар да қосылған. Кейін барлығы арнайы автобустармен ипподромға жеткізілген.

Бұл шара ахалтеке жылқысы мерекесіне орай ұйымдастырылып, алдын ала телетүсірілім үшін өткізілген. Сол күні мемлекеттік телеарнада «Галкыныш газ кен орны» жобасының төртінші кезеңінің іске қосылуына арналған тағы бір рәсім де көрсетілген, оған да балалар қатыстырылған.

Куәгерлердің айтуынша, қыз балалар ұлттық киіммен таңертеңнен түске дейін ашық аспан астында қозғалыссыз тұрған. Суық ауа райында олар қолдарына шар ұстап, жылынуға мүмкіндік алмаған. Соның салдарынан көптеген балалар ауырып қалған.

Ата-аналардың бірі: «Балалар суық тиіп келді. Келесі күні кейбірін мектепке бара алмағандықтан ауруханаға апарып, екпе салдырдық», – дейді. Оның айтуынша, шараға қажетті киім-кешек пен керек-жараққа, кейін ем-домға қомақты қаржы жұмсалған.

Жергілікті тұрғындардың сөзінше, мұндай іс-шараларға қатысатындар «таза өмірбаяны» бар және тұрмысы жақсы отбасылардан таңдалады. Бұл балалар арасында әлеуметтік бөлінуге әкеліп, кейбірінің өзін «басқалардан жоғары» сезінуіне, ал өзгелердің кемсінуіне себеп болады.

Дәрігерлердің айтуынша, ұзақ уақыт суықта тұру, әсіресе дымқыл жөргекте болу балалардың денсаулығына зиян келтіреді. Мұндай жағдайлар болашақта репродуктивті денсаулыққа да әсер етуі мүмкін.

Бақылаушылардың пікірінше, Түрікменстанда балаларды және бюджет саласы қызметкерлерін мемлекеттік шараларға күштеп тарту – жүйелі құбылыс. Мұндай акциялар билік үшін мобилизация мен бақылау құралына айналған. Сонымен қатар, тұрғындарды, оның ішінде балаларды мақта жинау сияқты ауыл шаруашылығы жұмыстарына тарту фактілері де жиі кездеседі.