ҰҚК Алматы әуежайында марихуана тасымалдаған шетелдік бойжеткенді ұстады
Ұлттық қауіпсіздік комитеті Алматы халықаралық әуежайында ірі көлемдегі есірткіні ел аумағына алып өту әрекетінің жолын кесті.
Ведомствоның мәліметінше, операция 30 мамыр күні полиция, кеден органдары және Орталық Азия өңірлік ақпараттық үйлестіру орталығымен бірлесіп жүргізілген.
Тексеру барысында Оңтүстік-Шығыс Азия елдерінің бірінен келген шетел азаматының жүгінен шамамен 21 келі марихуана табылған. Тыйым салынған зат тәркіленіп, күдікті ұсталды.
Аталған дерек бойынша полиция Қылмыстық кодекстің 286-бабы 1-бөлігі («Айналымнан алынған немесе айналымы шектелген заттардың контрабандасы») бойынша сотқа дейінгі тергеуді бастады.
ҰҚК Қылмыстық-процестік кодекстің 201-бабына сәйкес тергеу мүддесіне байланысты өзге мәліметтердің жария етілмейтінін хабарлады.