Украинаның бұрынғы бас прокурорының ісі бойынша тергеу басталды
Украинаның бұрынғы бас прокуроры Юрий Луценко "қызметтік өкілетін асыра пайдаланды" деген күдікке ілінді, іс бойынша тергеу басталды деп хабарлады "Украинская правда" интернет сайты.
Сайттың жазуынша, Луценконың үстінен қылмыстық іс тамыз айында қозғалған. Осыдан шамамен екі бұрын Киев соты сол уақытта бас прокурор қызметін атқарған Луценконың "заңсыз әрекетін" тергеу реестріне енгізуді міндеттеген, осыдан кейін жемқорлықпен күрес бюросы іс қозғады.
54 жастағы Юрий Луценко 2016 жылдың мамыр айы мен 2019 жылдың тамыз айы аралығында Украинаның бас прокуроры қызметін атқарған. АҚШ-тың бұрынғы вице-президенті Джо Байденнің ұлы Хантер Байден істеген газ компаниясын зерттеуге жетекшілік етті. 2017 жылы "Бурисма" газ компаниясы мен оның иесі Николай Злочевскийге байланысты зерттеуді тоқтатты. Дегенмен 2019 жылы Дональд Трамптың жеке адвокаты Рудольф Джулианимен кездесіп, "Бурисма" ісін талқылаған.
Луценконың Джулианимен кездескенін Трамптың Зеленскийге "қысымы жайлы" хабарлаған Америка тыңшысы шағымында жазған. Бұл шағым және 25 шілде күнгі Дональд Трамп пен Владимир Зеленскийдің телефон әңгімесінің стенограммасы Трампқа импичмент жариялау процедурасын бастауға түрткі болды.
Instagram бізге жазылыңыз