Венесуэла АҚШ операциясы салдарынан кемінде 100 адам қаза тапқанын мәлімдеді
Венесуэланың Ішкі істер, әділет және бейбітшілік министрі, азаматтық қауіпсіздік жөніндегі вице-президент Диосдадо Кабельо АҚШ-тың Каракаста жүргізген әскери операциясы салдарынан кемінде 100 адамның қаза тапқанын мәлімдеді.
Бұл туралы Telesur арнасы хабарлады.
Диосдадо Кабельо сәрсенбі күні эфирге шыққан Con el Mazo Dando бағдарламасында қаза тапқандардың басым бөлігі жастар екенін атап өтті. Оның айтуынша, бұл – Венесуэлаға қарсы бағытталған АҚШ-тың әскери агрессиясының салдары.
Министр мемлекет басшылығын уақытша қабылдаған Делси Родригеске ел билігінің толық қолдау білдірілгенін жеткізді. Сондай-ақ ол:
«Венесуэла берілмейді. Бұл – тарихы терең мен мұраға бай ел», – деп мәлімдеді.
Бұған дейін Куба билігі президент Николас Мадуроны қорғау кезінде қаза тапқан 32 адамға байланысты елде екі күндік аза тұту жариялаған болатын.
Еске салайық, 3 қаңтарда АҚШ Венесуэла аумағында арнайы операция жүргізіп, президент Николас Мадуро мен оның жұбайы Силия Флоресті Каракаста тұтқындаған еді. Кейін АҚШ президенті Дональд Трамп Мадуро мен оның әйелі кемемен Нью-Йоркке жеткізіліп жатқанын хабарлады.
Николас Мадуро мен Силия Флореске АҚШ-та есірткі терроризміне қатысы бар қастандық, кокаин тасымалдау, пулеметтер мен жарылғыш заттарды сақтау және АҚШ-қа қарсы қолдану мақсатындағы келісімдер бойынша айып тағылды.
Осы күні Венесуэланың Жоғарғы соты вице-президент Делси Родригеске президенттік өкілеттіктерді толық беріп, ол уақытша мемлекет басшысы ретінде ант қабылдады.
6 қаңтарда Мадуро мен оның жұбайы күшейтілген күзетпен Бруклиндегі тергеу изоляторынан Манхэттендегі сот ғимаратына тікұшақпен жеткізілді. Алайда олар өздеріне тағылған айыптарды мойындамады. Келесі сот отырысы 17 наурызға белгіленген.