«Зеленскийдің жағдайы жаман емес. Ол – батыл адам» – Трамп
АҚШ президенті Дональд Трамп Украинаға қатысты ұстанымын тағы бір рет өзгертіп, Украина президенті Владимир Зеленскийдің «жағдайы жаман емес» екенін мәлімдеді.
Ақ үйде НАТО-ның бас хатшысы Марк Рюттемен кездесуі кезінде Sky News тілшісі Марк Стоун Трампқа:
– «Сіз жеңімпаздарды ұнатасыз. Сіздің ойыңызша, қазір Зеленский жеңіп жатыр ма?» – деген сұрақ қойды.
Трамп:
– «Оның жағдайы жаман емес. Қалай болғанда да, ол берілмей отыр. Екі жақтан да көп адам қаза тауып жатыр. Бірақ меніңше, ол жағдайды жақсы алып келе жатыр. Бір нәрсені мойындау керек – ол батыл адам. Оның қаруы жақсы, бірақ одан да маңыздысы – оның жауынгерлері өте мықты, нағыз сарбаздар», – деп жауап берді.
Бұған дейінгі кешкі видеоүндеуінде Зеленский Украина армиясының Ресей аумағындағы алыс қашықтыққа жасалған соққыларының алғашқы нәтижелерін қорытындылаған болатын.
Оның айтуынша, мұнай өңдеу зауыттарына жасалған шабуылдардан кейін Ресейдің 60-тан астам өңірінде жанармай тапшылығы байқалып отыр. Сондай-ақ Ресей билігі әуе қорғаныс жүйелерін Мәскеу мен Валдайды қорғауға көбірек шоғырландырғандықтан, елдің басқа аймақтарының қорғанысы әлсіреген.
Зеленский Украина Ресейді «бейбітшілікті таңдауға мәжбүрлеу» үшін серіктестерінен қосымша қолдау күтетінін айтты.
– «Біздің операцияларымыз, соның ішінде Қырымдағы операцияларымыз нақты жоспарланған. Оның барысы соны дәлелдеп отыр. Егер G7 аясында серіктестерімізбен талқылаған мүмкіндіктер Украинаға берілсе, бұл олардың саяси шешіміне байланысты, онда біз Ресейді бейбітшілікті таңдауға мәжбүр ететін жағдайды тез қалыптастырамыз», – деді ол.
Трамптың ұстанымы өзгере бастады
Трамптың Украинаға қатысты көзқарасының өзгергені 15-17 маусым күндері Францияның Эвиан қаласында өткен G7 саммитінен кейін айқын байқала бастады.
Саммиттен соң Франция президенті Эммануэль Макрон Трамптың Украинаға қатысты «нақты көзқарас өзгерісін» көрсеткенін мәлімдеді.
Financial Times басылымының дереккөздері Украина армиясының Ресей аумағындағы нысандарға жасаған шабуылдары Трампқа «үлкен әсер қалдырғанын» жазды.
Kyiv Independent басылымының мәліметінше, жоғары лауазымды украин шенеунігінің айтуынша, Трамп жеке әңгімелерінде Зеленскийді Ресейге қарсы «батылырақ әрекет етуге» шақырған.
Сонымен бірге Foreign Policy басылымының жазуынша, Ақ үй Украинаға барған сайын қолайлырақ көзқарас танытып жатқанымен, Вашингтон Мәскеуге қатысты қатаң мәлімдемелер жасаудан әлі де тартынуда.
Еуропалық шенеуніктердің бірі Ақ үйден Ресейдің соғысқа байланысты әрекеттерінің бірін ашық айыптауды сұрағанын, алайда АҚШ әкімшілігі мұндай қадам келіссөздерге зиян келтіреді деген уәжбен бас тартқанын айтты.
Тағы бір еуропалық дипломат Ақ үй өкілдері Ресейді жария түрде сынағысы келмейтінін мойындаған.
Мәскеудің реакциясы
Reuters агенттігінің хабарлауынша, Ақ үйдің ұстанымының өзгеруі Мәскеуде «күшейіп келе жатқан наразылыққа» себеп болған.
Ресей сыртқы істер министрі Сергей Лавров 23 маусым күні Мәскеуде өткен форум барысында:
«Аляскадағы кездесу де, Еуропаның әрекеттері де Киев режиміне қайта қарулануға уақыт ұтып беру үшін ұйымдастырылған деп ойлағым келмейді. Бірақ іс жүзінде дәл солай болып шықты», – деді.
Сондай-ақ Лавров Мәскеу Ақ үйдің Украина мәселесіндегі нақты ұстанымын білгісі келетінін айтты.
«Эвианда не болғанын түсінгіміз келеді. Макронның сөзін тыңдасақ, Анкоридж ұмытылған, президент Трамп адасқан ұлдай немесе адасқан әкедей қайтадан өз отбасының қатарына қосылғандай әсер қалдырады. Енді бәрі қайтадан бірге жүргендей көрінеді», – деді Ресей сыртқы істер министрі.
Оның айтуынша, АҚШ Ресейге G7 саммитінен қандай қорытынды шығарғанын және алдағы бағыты қандай болатынын әлі хабарлаған жоқ.