Жетісу облысында Ekin Patrol G2 мобильді камерасы іске қосылды
Жетісу облысының жүргізушілері төбесінде арнайы дабыл мен барлық жаққа қарап тұратын камера батареясы бар құрылғы орнатқан патрульдік полиция көлігін байқаған болар.
Бұл кешен Ekin Patrol G2 деп аталады.
Patrol G2 жүйесі 36 градустық бейнебақылау, жылдамдық асырғандарды тіркеу, сонымен қатар әртүрлі қозғалыс жолағында түрлі жылдамдық режимін белгілеу, көлік нөмірін автоматты түрде анықтап, деректер базасынан көлік ұрланған не ұрланбағанын, тұраққа қою ережесін бұзған-бұзбағанын тексеру сияқты көптеген функцияға ие.
Zakon.kz порталының мәліметі бойынша жаңа жүйе облыс аумағында сынақтан өтіп жатыр. Оны елімізде жаппай қолдана ма, жоқ па, әзірге белгісіз.
Ekin Patrol G2-ні алғашқы болып сынаған Жетісу облысы емес екенін айта кеткен жөн. Қазақстанда жүйені 2021 жылдан бері пайдаланып жүр. Осыған ұқсайтын құрылғыларды Рудный, Қарағанды, Көкшетау және Қостанай жүргізушілері де көрген болар.