Назарбаева: Қаласаңыз, бәрін ұрысып, сынай беріңіз

Дерек көзі: www.azattyq.org - 21.02.2019220

Қазақстан парламентінің сенат депутаты, президент Нұрсұлтан Назарбаевтың үлкен қызы Дариға Назарбаева "сөз бостандығына баға беретін түрлі рейтингтерге күмәнмен қарайтынын" айтты. Назарбаева "Сөз бостандығы индексінде" Қазақстан көрсеткіштерінің нашарлағаны" жайлы сұраған журналистке: "Сөз бостандығы жоқ деп санайсыз ба?" деп қайтара сауал қойып: "Қаласаңыз, бәрін ұрысып, сынай беріңіз. Әлеуметтік желіде бәрі ашық жазылады. Қандай рейтингті айтып тұрғаныңызды білмеймін", деп жауап берді.        Назарбаеваның айтуынша, "рейтингтің бәріне сене беруге болмайды - бәрі рейтингті кім, не үшін құрастыратынына байланысты". "Шекарасыз тілшілер" (Reporters Without Borders) халықаралық ұйымының былтыр сәуірдегі есебінше, Қазақстандағы сөз бостандығы мен баспасөз еркіндігінің жағдайы нашарлай түскен. Астана "баспасөз еркіндігі рейтингінде" 54,41 ұпаймен 158-орында тұр.  "Елдегі репрессия спиралі төмендеген жоқ. Қазақстанды отыз жылға жуық үздіксіз басқарып отырған Нұрсұлтан Назарбаевтың ізбасары туралы айтылмайды. Ал Назарбаев билікті өз қолына алып, оны сақтап қалу үшін қысымды күшейтті" деп жазады ұйым. Зерттеу авторларының айтуынша, Қазақстандағы негізгі оппозициялық газеттер 2012 жылы жабылды. Қалғандары көптеген айыппұлдардан кейін жұмысын тоқтатуға мәжбүр болған. "Шекарасыз тілшілер" ұйымы Қазақстанда 2017 жылы БАҚ туралы заңға өзгертулер енгізілгенін, бұл заң журналистердің жұмысын қиындата түскенін жазады. "Журналистер көп қудалауға ұшырайды. Қазір ел билігі интернетті бақылауға алған. Елде сайттар, әлеуметтік желілер мен мессенджерлер көп бұғатталады" деп жазылған зерттеудің Қазақстан туралы бөлігінде. Дереккөз: Азаттық радиосы

Мақала авторы:

www.azattyq.org

Пікір қалдыру

Пікір жазу үшін сайтқа кіріп, телефон нөмірін растаңыз.