«Қамалған бауырларымның босатылуын сұраймын»

Нұрболат Әлдибек - 11.06.20191173

Танымал эстрада әншісі сайлауға қатысты митингіге түскен қоғамдық белсенділерге араша түсті. Ол туралы әнші Instagram әлеуметтік желісіндегі парақшасында жазды.

«Иә, мен әншімін. Бұл менің бала-шағамды асырап отырған жұмысым. Осы уақытқа дейін ешкімнің жағына шыққан адам емеспін, себебі xалықтың тыныштығы мен үшін ең маңыздысы. Алайда, соңғы жаңалықтарға байланысты айтарым, xалқымның қаны төгілсе, қарап қалмаймын. Өйткені, мені көтерген xалық! Елімде болып жатқан жайттарға жүрегім ауырғаннан, бей-жай қарап, үнсіз отыра алмаймын. Бірақ 1986 жылғы оқиғаның, қазағымның қаны төгілгенін де қаламаймын. Құдай сабыр берсін!

Биліктегілерге xалықтың мұң-мұқтажын еститін кез келді. ҚР Конституциясына сәйкес, мемлекеттің ең бірінші байлығы ол -халық. Халыққа қарсы шығу ол Аллаға қарсы шығумен тең. Осы орайда, үкіметтен барлық жанайқайын жеткізіп, қамалған бауырларымды, халықты босатуыңызды сұраймын!

Бұл дүниеде барлық нәрсе Алланың қалауымен болатынында естен шығармағанымыз абзал! Алланың өз есебі бар шығар. Бүлік шыққан мемлекеттердің де оңғанын көрмедім. "Ашу ыза, ақыл дос" демекші, барлығына басқаша қарайық. Құдай қайырын берсін! Еліміз тыныш, жұртымыз аман болсын!», - деп жазған әнші.

Қазақстанда 9 және 10 маусым күні сайлауға байланысты митингтер өткен. Ресми мәлімет бойынша 700 адам ұсталды. 2015 жылы Қайрат Нұртас «Нұр Отан» партиясына мүше болған еді.


Фото: stan.kz

Мақала авторы:

Нұрболат Әлдибек

Пікір қалдыру

Пікір жазу үшін сайтқа кіріп, телефон нөмірін растаңыз.