Ең тәтті қауын-қарбыз Мақтааралда

Бақытжан Әбдіраш - 15.07.2019945

Әлемдегі ең тәтті қауын-қарбыз Мақтаарал ауданында егіледі. Бұл - Ресейлік және Еуропалық кәсіпкерлердің сөзі. Бұған дәлел маусым кезінде күн сайын қауын-қарбыз тиелген 200-300 жүк көлігі ТМД елдеріне, Балтық жағалауы елдеріне, Түркия, Германия, Грекия елдеріне жол тартады.

Мақтаарал ауданы әкімдігінің таратқан мәліметіне қарағанда,

былтыр мақталы өлкеде 316 366,5 тонна бақша өнімдері өндірілді. Ал, биыл 11 502 гектарға бақша дақылдары егілді. Мұның ішінде 10 мың гектары қауын, 1500 гектардан астамы қарбыз дақылы. Қазірдің өзінде 35 мың тоннаға жуық бақша өнімдері Қазақстанның барлық аймағына таралып, Ресейге және Еуропаның бірнеше елдеріне экспортталып үлгерді.

Айта кетейік, Мақтаарал ауданының диқандары Республикада ең бірінші болып және Өзбекстанға қарағанда 1 апта бұрын бақша өнімдерін нарыққа шығарады.

Ғылым мен еңбекті ұштастырған сәтте кез келген қамалды бағындыруға болады. Мақтаарал ауданында "Қазақ мақта шаруашылығы" ғылыми-зерттеу институтының ғалымдары "ақ алтынды" зерттеумен ғана тоқтаған жоқ. Бұрыннан балдай тәттілігімен, ерекше үлкендігімен танымал болған "Мырзашөл" қауынын экспортқа ыңғайластырып, бүгінде облыстағы бірнеше аудандардың диқандары жаппай егіп жатқан "Жиенбет", "Валеть" сияқты  қауынның сорттарын  шығарды.

Жаңа сорттардың дәмі тіл үйіреді және тасымалдауға төзімді, яғни ұзақ жолға бейімделген. Көлемі де ыңғайлы, бір қорапқа 6-7 қауын сияды. Жаңа сорттардың арқасында соңғы жылдары диқандар үлкен табыс тауып, күллі Ресей мен Еуропаның бірнеше елдерінің нарығына кіріп отыр.

Қазіргі таңда Мақтаарал ауданының кіреберісіндегі логистикалық орталық жүк көліктеріне лық толған. Еуропадан және басқа да елдерден келген кәсіпкерлер үшін орталықта барлық жағдай жасалған. Атап айтқанда, қонақ үй, кафе, автотұрақ, бассейн кешені мен қосалқы бөлшек дүкенінің қызметтері қарастырылған. Алдағы уақытта көкөніс сақтау қоймасы да іске қосылады.

Осылайша қауын-қарбыз бизнесі Мақтаарал ауданында тұтас бір индустрияның дамуына жол ашып отыр.

Фотоны автор ұсынды.


Мақала авторы:

Бақытжан Әбдіраш

Пікір қалдыру

Пікір жазу үшін сайтқа кіріп, телефон нөмірін растаңыз.