Жәйремдегі жанжалға байланысты тергеу басталды

Дерек көзі: www.azattyq.org - 13.08.2019278

Қарағанды облысындағы Жәйрем тау-кен комбинатында болған жанжалдан кейін полиция тергеу бастады. Жергілікті биліктің дерегінше, 12 тамызда болған жанжалдан шетелдік бірнеше жұмысшы «аздап жараланған». Полиция бұл оқиға бойынша Қылмыстық кодекстің «Бұзақылық» бабымен іс қозғалғанын хабарлады.

Қарағанды полиция департаментінің мәлімдемесінде қазір Жәйремде «жағдай реттелгені, полицейлер бақылауға алғаны» жазылған. Ал департаменттің баспасөз қызметі тергеу құпиялығына сілтеп, «органдар Жәйремде не болғанын анықтайды» деп мәлімдеді.

12 тамызда жанжал шыққан Жәйремге Қарағанды облысы әкімдігінің өкілдері барған. Әкімдік жанжал себебін және жаралағандардың қай ел азаматы екенін ашып айтпады. Қарағанды облысы әкімдігі Жәйремге облыс әкімі Ерлан Қошановтың барғанын, «жағдай реттелгенін» ғана хабарлады.

Ескі Жәйрем және Жаңа Жәйрем елдімекендерінің тұрғындарының айтуынша, дүйсенбі кешкісін және 13 тамыз таңертең шенеуніктер жиналыс өткізіп, жұртты сабырға шақырған. Аты-жөнін айтқысы келмеген тұрғындар Азаттыққа жанжал жалаңаш қыздың суретінен шыққан. Енді бірінің сөзінше, жергілікті тұрғындар комбинатта шетелдік жұмысшылардың істегеніне қарсы шыққан.

Жәйрем тұрғындары Азаттық тілшісіне аймақта жағдай тынышталғанын растады. Бірақ тұрғындар жергілікті жастардың жұмыс табу мәселесі, елдімекендегі әлеуметтік жағдай әлі шешілмегенін айтады.

Бұған дейін 1200 адам тұратын Ескі Жәйрем кентінің тұрғындары өздерін кеніш маңынан басқа жаққа көшіруді я денсаулықтарына залал келтіргені үшін өтемақы төлеуді талап еткен еді.

Азаттық «Қазцинк» компаниясына тиесілі Жәйремдегі комбинаттан ресми жауап ала алмады. Телефонды көтерген адам «басшылық орнында жоқ» деп жауап берді.

Оқи отырыңыз: Теңіз кенішіндегі оқиғаның ықтимал себебі қандай?

Бұл — Қазақстанда шетелдік жұмысшылар мен жергілікті тұрғындар арасында туған биылғы екінші жанжал. 29 маусымда Атырау облысындағы Теңіз кенті жұмысшылары арасында жанжал шығып, кем дегенде 40 адам зардап шеккен. Ливан мен Иордания басылымдары қақтығыстан соң жүздеген азаматының Қазақстаннан қайтқанын жазған. Қазақстан билігі мұны "тұрмыстық дау" деп атаған.

Мақала авторы:

www.azattyq.org

Пікір қалдыру

Пікір жазу үшін сайтқа кіріп, телефон нөмірін растаңыз.