Жастар театры халықаралық фестивальде жүлде алды

Дерек көзі: www.azattyq.org - 19.11.2018211

Биыл қырғыз жазушысы Шыңғыс Айтматовтың туғанына 90 жыл толады. Осыған орай Қырғызстан президенті ұлы жазушының мерейтойын халықаралық деңгейде өткізу туралы жарлық шығарған. Осы жарлыққа сәйкес ұйымдастырылып жатқан халықаралық деңгейдегі «Шыңғыс Айтматов және театр-2018» фестивалі өтті. Қазақстан, Қырғызстан, Ресей, Әзірбайжан, Тәжікстан, Италиядан келген театрлар қатысқан фестивальдегі басты шарт – спектакльдер Шыңғыс Айтматов шығармалары негізінде қойылуға тиіс. Бішкектегі Токболот Абдымомунов атындағы Қырғыз ұлттық академиялық театрында өткен өнер тойына Қазақстанның атынан Астана қаласындағы Жастар театры барып қайтты. Бұл туралы театрдың баспасөз қызметі хабарлады. 2007 жылы ғана құрылған Астана қалалық Жастар театрының ғұмырнамасында Шыңғыс Айтматовтың орны ерекше. Өйткені, осы жылы 5 шілде күні театр тұңғыш шымылдығын Шыңғыс Айтматов пен Әбіш Кекілбайұлының «Шыңғысхан» спектаклімен ашқан. Қазақстанның еңбек сіңірген қайраткері Нұрқанат Жақыпбайдың режиссерлігімен қойылған бұл әфсана жазушының биылғы тойына тарту ретінде Бішкекке барып қайтты. Қойылым «Шыңғыс Айтматов және театр-2018» фестивалінің «Үздік қойылым» номинациясы бойынша жүлделі 1 орын иеленді. Жазушының 90 жылдық мерейтойында топ жарған «Шыңғысхан» 2010 жылы Орта Азия мемлекеттерінің III Халықаралық театрлар фестиваліне қатысып, «Үздік режиссура» аталымы бойынша бәйге алған. Сонымен қатар, осы фестивальде «Үздік Шыңғысхан рөлі» номинациясы бойынша актер Әділ Ахметов (Шыңғыс ханның ролін ойнаған) жеңімпаз деп танылған еді. Сондай-ақ, 2016 жылы Тәуелсіз Мемлекеттер Достастығының (ТМД) 25 жылдығы қарсаңында Белоруссияның Брест қаласында өткен «Белая Вежа» ХХІ Халықаралық театрлар фестивалінде де «Ең әсерлі қойылым» («За зрелищное воплощение поэтических притчи») аталымын жеңіп алған болатын.

Мақала авторы:

www.azattyq.org

Пікір қалдыру

Пікір жазу үшін сайтқа кіріп, телефон нөмірін растаңыз.