Жас ақынның арнауы: Жолдауды оқу – ұлылықпен тыныстау

Ербол Ілияс - 10.09.20191310

Президент Қасым-Жомарт ТОҚАЕВТЫҢ жолдауына Алматы облысының жас ақындары да қолдау білдіруде. Алакөлдік жас ақын жолдауға қолдауды өлең арқылы білдіргісі келіпті. Жолдауға арналған өлең жолдары өңірлік 7-su.kz (облыстық «Жетісу» газеті) сайтында жарияланды. 

Өлең авторы Қадырсұлтан НҮСІПХАН Алакөл аудандық "Jas Otan" жастар қанатының мүшесі екен.

Президент лауазымына кіріскелі алғашқы рет халыққа жолдау жасаған  ТОҚАЕВҚА арнап бұған дейін "Темірқазық" әні жазылған. Оның мәтінін Назарбаевтар отбасына өлең жазумен көпке танылған Балтабек НҰРҒАЛИЕВ, әнін Әбдіғаппар ТЕМІРХАНОВ жазып, Дәурен ТАШЕНОВ орындап шыққан болатын.

Ал, сол жолды жалғап, президент жолдауы шабыт берген жас ақын Тоқаевтың жолдауын оқып шыққанын алға тартады. Ол өз өлеңінде «Жолдауды оқу – ұлылықпен тыныстау» деген ой айтады. "Жас АЛАШ" оқырмандарына жас ақынның өлеңін түгелдей ұсынуды жөн көрдік.

Президенттің оқып шығып Жолдауын,
Көрсетсе екен әрбір адам қолдауын.
Елім аман, жұртым тыныш болса ғой,
Жат біреулер жасамасын қорлауын.


Президенттің оқып шығып Жолдауын,
Еңбегінің ел тілесін оңдауын.
Ана тілің асқақтайды, ағайын,
Сезінерсіз шын ғажаптың орнауын.


Президенттің оқып шығып Жолдауын,

Байқамаймын көңіліңнің толмауын.

Адал еңбек ертең сыйлар жемісін,
Жемқорлықтың үз ертерек торлауын.


Президенттің оқып шығып Жолдауын,

Көрсең еді көңіл гүлі солмауын.

Уа, ағайын, үзілместен  ұлы көш,
Біз тілейік сәтсіздіктің болмауын.


Президенттің оқып шығып Жолдауын,

Әрбір адам жасап жатыр қолдауын.
Міне, осындай ұлылықпен тыныстап,

Жарқын күнге жетелеуде жолдарым.

Жас ақын Қадырсұлтан НҮСІПҚАН 1987 жылы ҚХР Алтай аймағы, Шыңгіл ауданында дүниеге келген. Халықаралық  ұстаздар одағының мүшесі. «Суретшілер тілі» кітабының авторы. Қазір Алматы облысы Алакөл ауданы Ынталы ауылында тұрады.

Фото және өмірбаян: adebiportal.kz

Мақала авторы:

Ербол Ілияс

Пікір қалдыру

Пікір жазу үшін сайтқа кіріп, телефон нөмірін растаңыз.