Шамалған: Әкімді полиция қоршап тұрды

Асмира Ермекқызы - 15.09.20197286

Жол көлік апаты болған Шамалған станциясының халқы Алматы облысының басшысы Амандық БАТАЛОВТЫҢ келуін талап еткен еді. Алайда әзірге наразы жұрттың алдына Қарасай ауданының әкімі Жандарбек ДАЛАБАЕВ жетті.

Әкім бұқараға полиция қызметкерлерімен бірге келді. Қолына дыбыс күшейткіш құрал алып сөйлеген әкімді полиция қоршап тұрды. Бізге полицияның әкім Жандарбек Далабаевты кімнен қорғап тұрғаны түсініксіз болды. Себебі халық тек қана Шамалғандағы қордаланған проблемаларды ғана айтумен болды. Ең бастысы бізге теміржол өткелінен өтетін аспалы көпір керек деп ұрандатты жиналғандар. «Мост, мост, мост, мост» деп айқайлады. Сондай-ақ, аудан басшысынан «Шамалған станциясының әкімі қайда?» деп сұрағандар да болды.


«Шамалған станциясының әкімі келгенде не жасайды? Мен тұрмын ғой. Ертең деп сендерге өтірік айтпаймын. Аптаның екінші күні маған келіңдер. Арнайы жұмыс тобын құрайық. Мен сіздерді қабылдаймын. Барлық проблемаларды отырып шешейік. Бұл жердегі жағдайды мемлекет басшысы да, облыс әкімі де біліп отыр. Жүргіншілер үшін көпір болады. Ал аспалы көпір салып берем деп айта алмаймын. Оны бірігіп шешейік. Ал қазір тарқайық. Түнімен тұрсаңдар да көпір болмайды», - деді әкім Жандарбек Далабаев.

Естеріңізге сала кетейік, 15 қыркүйек күні кешкі сағат 19-00 де Алматы облысы Ақсеңгір-Шамалған теміржол өткелінде пойыз автобусты соғып өтті. Автобус жүргізушісі қайтыс болды. Қазір жол апаты болған жерде жүздеген адам жиналып, өз наразылықтарын білдіруде. Көпшіліктің айтуынша, аспалы көпір мәселесі жиырма жылдан бері айтылып келе жатыр. Егер «переездге» аспалы көпір салынған болса, бүгінгі қазалы оқиға болмас еді дейді.


Фотолар автордікі.

Мақала авторы:

Асмира Ермекқызы

Пікір қалдыру

Пікір жазу үшін сайтқа кіріп, телефон нөмірін растаңыз.