Сотта Ислам Әбішевке медициналық көмек көрсетілді

Мадияр Жалғасұлы - 16.10.20192318

Бүгін астанада ауданаралық мамандандырылған сотта Ислам ӘБІШЕВ пен Серік ТҮКИЕВТІҢ ісіне қатысты үшінші отырыс басталды. Сағат 10:00-де басталатын сотқа қатысушыларды жарты сағатқа жуық кіргізбей, сот орындаушылары есік алдында ұстап тұрды. Себебі, айыпталушы Ислам АЛМАХАНҰЛЫНЫҢ денсаулығы сыр беріп, сот орындаушылары жедел жәрдем шақырған.

«Ағамыздың жағдайы нашар деп, жақын туыстарын жанына кіргізді. Басу айтып, сөйлесіп, біраз көмек көрсеттік. Кеше ғана ағамыз суық жерде отырғандарын айтып шағымданғанын білесіздер, бүгін де аяқ-қолы тартыла бастаған. Жанында отырған айыпталушы Серік Түкиев алғашқы көмек жасаған. Жедел жәрдем келгенімен, мүлде дәрі-дәрмектері жоқ. Сот кезінде дәрігерлердің болуын талап етіп жатырмыз», - деді айыпталушының бауыры Ералхан ӘБІШЕВ.

Кезекті сот отырысы басталған сәтте айыпталушы Серік Түкиевтің інісі, қорғаушы Марат ТҮКИЕВ қатардағы орындаушы приставтың себепсіз сот залына кіргізбей, жолын бөгегені үшін шағымданды. Дегенмен, мәселені қараған судья Қажымұқан МЕКЕМТАС қорғаушы шағымын қанағаттандырмады.

Адвокат Абзал ҚҰСПАН судьяға Ислам Әбішевтің денсаулығын дәрігерлерге тексертуге өтініш білдірді, судья өтініштің жауабын 15:40-та айтатынын жеткізіп, сот отырысына үзіліс жариялады.

Су комитетінің бұрынғы төрағасы Ислам Әбішевке "ірі көлемде пара алуға оқталды" деген айып тағылған.  


Осы тақырыптың басы: "Ислам Әбішевті 97 мыңға қонақ үйге орналастырдым"



 

Фото автордікі. 


Мақала авторы:

Мадияр Жалғасұлы

Пікір қалдыру

Пікір жазу үшін сайтқа кіріп, телефон нөмірін растаңыз.